پەتروپاۆلعا لوندوننان ارنايى رەيسپەن 95 قازاقستاندىق ۇشىپ كەلدى
س ق و اكىمدىگى ىشكى ساياسات باسقارماسىنىڭ مالىمەتىنشە، ۇشاقپەن 95 قازاقستاندىق كەلدى. ولار ءار ءتۇرلى جاعدايعا بايلانىستى شەتەلدە بولعان ەلىمىزدىڭ 13 قالاسىنىڭ تۇرعىندارى. رەيستى ماماندار اسقان قاۋىپسىزدىك شارالارىن ساقتاي وتىرىپ قارسى الدى. بەكىتىلگەن الگوريتمگە ساي بارلىق قىزمەتتەردىڭ ءىس- قيمىلى ۇيلەستىرىلدى. سانيتارلىق- ەپيدەميولوگيالىق قاۋىپسىزدىك شارالارى ساقتالدى، ياعني اۋەجاي اۋماعى، جۇك قوياتىن جانە ورنالاستىرۋ ايماقتارى دەزينفەكسيالاندى. ۇشاق جولاۋشىلارى مەن ەكيپاج مۇشەلەرىن اكىمدىك جانە پوليسيا قىزمەتكەرلەرى ارنايى باعىت بويىنشا الدىن الا دايىندالعان مەيمانحاناعا جەتكىزدى. مامانداردىڭ ايتۋىنشا، كەلۋشىلەرگە بار جاعداي جاسالعان.
«جولاۋشىلاردى جانە ەكيپاج مۇشەلەرىن پەتروپاۆلداعى كوپ ادام قابىلداي الاتىن ۇلكەن مەيمانحانالاردىڭ بىرىنە ورنالاستىردىق. مەيمانحانادا بارلىق سانيتارلىق- ەپيدەميولوگيالىق تالاپتار ساقتالدى. كەلگەندەر ەكى تاۋلىككە وقشاۋلاندىرىلدى. بۇل جەردە ولار COVID-19 ۆيرۋسىنا الىنعان زەرتحانالىق تالداۋ قورىتىندىسىن كۇتەدى. ناتيجەسىن العاننان كەيىن تۇرعىلىقتى جەرلەرىنە، ءۇي كارانتينىندە وتىرۋ ءۇشىن اتتاندىرىلادى»، - دەلىنگەن باسپا ءسوز حابارلاماسىندا. س ق و اكىمىنىڭ ورىنباسارى رۋسلان الىشيەۆ بۇعان دەيىن وسى جاعدايعا بايلانىستى ءوڭىر تۇرعىندارىنىڭ الاڭداۋىنا نەگىز جوقتىعىن ايتقان ەدى.
