سيريالىق بوسقىنداردىڭ 95 پايىزى يوردانيانى پانالاۋدا
ميگرانتتار شاتىرلاردى پانالاعاندىقتان، تابيعاتتىڭ ءتۇرلى توسىن مىنەزىنە توزۋگە ءماجبۇر، - دەپ حابارلايدى 24.kz. ال ماماندار «دالالىق ومىردە تازالىق بولماعاندىقتان، ادامدار اراسىندا جۇقپالى اۋرۋلار تارالۋى مۇمكىن» دەپ قاۋىپتەنىپ وتىر.
بۇل - 34 جاستاعى سيريا ازاماتى حالەد ماللاك. ول ايەلى مەن التى بالاسىن ەرتىپ تۋعان جەرى داماسكىنى تاستاپ كەتكەن. بۇگىندە «ازراك» لاگەرىن پانالاعان بوسقىنداردىڭ ءبىرى. ايتۋىنشا، مۇندا قايىرىمدىلىق ۇيىمدارىنىڭ جەتكىزەتىن ازىق- تۇلىگىن الۋ ءۇشىن ۇزىن- سونار كەزەكتە تۇراتىنى بولماسا، اش قۇرساق ەمەس.
- وسىندا تۇرىپ جاتقانىما ءۇش اي ءوتتى. شاعىمدانبايمىن. ءبىراق جەتىسىپ وتىرمىز دەۋگە دە كەلمەيدى. اسىرەسە، بالالارعا قيىن. اينالامىزدا تىشقان مەن ءتۇرلى جاندىكتەر ءورىپ جۇرەدى»، - دەيدى حالەد ماللاك. حالىقارالىق شارت بويىنشا يوردانيا كۇنىنە 300 بوسقىن قابىلداۋعا كەلىسىم بەرگەن. الايدا مۇندا كىرەتىن ءاربىر ادام ءجىتى تەكسەرىلەدى. سەبەبى كورولدىك بيلىگى اعىلعان بوسقىندارمەن بىرگە شەكارادان لاڭكەستەر دە كىرىپ كەتە مە دەپ قاۋىپتەنەدى. يوردانيا ۇكىمەتىنىڭ وكىلى موحامماد ءال- ءمومانيدىڭ ايتۋىنشا، «يراك پەن ليەۆانت لاڭكەستىك توبىنىڭ» وسى وڭىرگە دە كەلۋى ابدەن مۇمكىن. «سوندىقتان بۇل ماسەلەگە بەيجاي قاراي المايمىز. ءبىز ءۇشىن ەل تۇرعىندارىنىڭ قاۋىپسىزدىگى ءبىرىنشى ورىندا»، - دەيدى ول.
يوردانيا - سوعىستان قاشقان سيريالىقتاردىڭ باس ساۋعالاپ باراتىن ءبىرىنشى مەكەنى. كورولدىك بۇل ەلدەن كەلگەندەردىڭ 95 پايىزىنا پانا بولعان. قولىندا قارجىسى بولىپ تۇركيا، ەۋروپا اسقاندار دا جەتەرلىك. ءبىراق كوبى وسىندا تۇراقتاپ جاتىر. مەملەكەت سىرتتان كەلگەندەرگە كومەك بەرۋدە. ءبىراق ونىڭ قاشانعا دەيىن سوزىلارى بەلگىسىز. سەبەبى كورولدىككە قولۇشىن بەرەتىن حالىقارالىق ۇيىمدار كەتكەن شىعىننىڭ جارتىسىن عانا جابادى.
