تۇركيا بيلىگى: انكاراداعى لاڭكەستىك قۇرباندارىنىڭ سانى 95 ادامعا جەتتى

بۇل تۋرالى تۇركيا پرەمەر-ءمينيسترى اكىمشىلىگىنىڭ ۇيلەستىرۋ ورتالىعىنان حابارلاعان.

«شابۋىلدان زارداپ شەككەن 246 ادام اۋرۋحانالاردا ەمدەلىپ جاتىر، ولاردىڭ 48 ىنىڭ ءحالى اۋىر. 95 ەل ازاماتى كوز جۇمدى»، - دەلىنگەن مالىمدەمەدە.

ەل بيلىگى بەس مەديتسينالىق تىكۇشاق پەن ءبىر ارنايى ۇشاقتى ازىرلىكتە ۇستاپ وتىر.

تۇركياداعى تەرروريستىك توپتاردىڭ ەشقايسىسى ازىرگە بۇل لاڭكەستىكتى ءوز موينىنا الماي وتىر.

ەسكە سالا كەتەيىك، سەنبى كۇنى انكارادا «ەڭبەك. بەيبىتشىلىك. دەموكراتيا» بەيبىت نارازىلىق شەرۋى كەزىندە 2 جارىلىس ورىن العان بولاتىن. شەرۋگە قاتىسۋشىلار تۇرىك بيلىگى مەن كۇردتەر اراسىنداعى اسكەري قاقتىعىستاردى توقتاتۋدى سۇراعان ەدى.

انكاراداعى تەراكتىدەن سوڭ ەلدە ءۇش كۇندىك قارالى كۇن جاريالاندى.

ق ر س ءى م رەسمي وكىلى التاي ابيبۋللايەۆتىڭ حابارلاۋىنشا، انكاراداعى تەراكت سالدارىنان قازا تاپقاندار مەن زارداپ شەككەندەر اراسىندا قازاقستاندىقتار جوق.

فوتو: Burhan Ozbilici / AP