جاسى 95 كە تولعان سوعىس ارداگەرىنە وبلىس اكىمىنىڭ قۇتتىقتاۋ حاتى تابىس ەتىلدى

قىزىلوردا. قازاقپارات - قازالى قالاسىنىڭ تۇرعىنى مايدانگەر شاريف ابدۋلليننىڭ 95 جاسقا تولۋى بيىلعى ۇلى جەڭىستىڭ 70 جىلدىق مەرەكەسىمەن تۇسپا-تۇس كەلدى.

قازىرگى ۋاقىتتا بايقوڭىر قالاسىندا بالاسىنىڭ ۇيىندە تۇراتىن ۇلى وتان سوعىسىنىڭ ارداگەرى شاريف ءابدۋلليننىڭ وتباسىنا قازالى اۋدانىنىڭ اكىمى باقىت جاحانوۆ ارنايى باردى، دەپ حابارلادى اۋداندىق اكىمدىكتىڭ باسپا ءسوز قىزمەتىنەن.

اۋدان باسشىسى «ەل مۇددەسى جولىنداعى ەسەلى ەڭبەگىڭىزدىڭ زەينەتىن كورىپ، ءاردايىم ارامىزدا اقىلشى اعا، ارداقتى ازامات، ابىرويلى اقساقال بولىپ امان- ەسەن جۇرە بەرىڭىز»، - دەگەن وبلىس اكىمى قىرىمبەك كوشەربايەۆتىڭ قۇتتىقتاۋ حاتىن تابىستاپ، سىي قۇرمەت كورسەتتى.

جەڭىس كۇنىن جاقىنداتۋعا ۇلەس قوسقان مەرەيتوي يەسى عاسىرعا جۋىق عۇمىرىندا تالاي اسۋدان مۇقالماي ءوتىپ، ەڭبەك مايدانىندا قىزمەت ەتكەن.

ارداگەر اۋداندا اتقارىلىپ جاتقان جۇمىستاردى قولدايتىنىن ايتىپ، ءوز پىكىرىن بىلدىرە وتىرىپ، اق باتاسىن بەردى.