تۇركياداعى ءزىلزالادان 95 ساعات وتكەننەن كەيىن 7 جاسار قىز قۇتقارىلدى
قۇتقارۋ بريگاداسى حاتاي پروۆينتسياسى گەنەرال شيۋكريۋ كاناتلى اۋدانىنداعى جۇمىستارىن جالعاستىرىپ جاتىر. ءۇيىندىنىڭ استىندا ءتىرى ادامنىڭ بار ەكەنىن انىقتاعان قۇتقارۋشىلار مەن ءورت سوندىرۋشىلەر قىزدى امان الىپ شىقتى.
وعان العاشقى مەديتسينالىق كومەك كورسەتىلىپ، اۋرۋحاناعا جىبەرىلدى.
ايتا كەتەيىك، قۇتقارۋشىلار مەن دارىگەرلەر ەنگەن قازاقستان قۇتقارۋشىلارىنىڭ ەكى توبى قازىر تۇرىك ەلىندە ىزدەستىرۋ- قۇتقارۋ جۇمىستارىن جۇرگىزىپ جاتىر. ءبىرىنشى ەشالون – 7- اقپاندا، ەكىنشىسى 8-اقپاندا اتتانعان ەدى. العاشىندا قازاقستاندىق بورتپەن 16 ادام، ەكىنشى بورتپەن 64 ادام تۇركيادان ەلىمىزگە جەتكىزىلگەن ەدى.
9 -اقپاندا گازيانتەپتەگى وبەكتىلەردىڭ بىرىندە ەلىمىز ماماندار ۇيىندىلەر استىنان 3 ادامدى قۇتقارىپ العان بولاتىن.
تۇرىك ەلىندە ءزىلزالا كەزىندە جوعالىپ كەتكەن بىرنەشە قازاقستاندىق تابىلدى. ولاردىڭ ءبىرى - ءسابينا مامادياروۆا 8- اقپان كۇنى ءۇيىندى استىنان امان شىعارىلدى. حاتتايدا جۇمىس ىستەپ جاتقان قازاقستاندىق قۇتقارۋشىلار ءادىل قادىربەكوۆتىڭ ءولى دەنەسىن تاپتى. كوپ ۇزاماي ميربولات (ميرۋس) قۇرماشيەۆتىڭ دەنەسى دە قيراندىلار استىنان تابىلدى.
9- اقپاندا توتەنشە جاعدايلار ءمينيسترى يۋري يلين مەملەكەت باسشىسى قاسىم- جومارت توقايەۆقا قۇتقارۋ وپەراتسيالارى جونىندە ەسەپ بەرگەن بولاتىن.
سوڭعى مالىمەتكە سايكەس، تۇركيادا جويقىن جەر سىلكىنىسىنەن قازا تاپقاندار سانى 17 مىڭنان استى، 72 مىڭعا جۋىق ادام زارداپ شەكتى. ءزىلزالا 6- اقپان كۇنى بولدى. كاحرامانماراش- پازاردجيك اۋدانىندا 7,7 بالل قۋاتىمەن جانە ەلبيستاندا 7,6 بالل قۋاتىمەن جەر سىلكىنگەننەن كەيىن 648 افتەرشوك بولدى. جەراستى ءدۇمپۋى ەلدىڭ 10 پروۆينتسياسىندا، سونداي- اق كورشىلەس ەلدەردە، سونىڭ ىشىندە سيريادا سەزىلدى.
فوتو: aa.com.tr
اۆتور
بالنۇر قوجاگەلدى
