قازاقستاندا بولاشاعى جوق 94 اۋىل جابىلدى
بۇل تۋرالى ق ر ۇلتتىق ەكونوميكا مينيسترلىگىنىڭ قازاقپارات تىلشىسىنە بەرگەن رەسمي جاۋابىندا ايتىلعان.
«الەۋمەتتىك- ەكونوميكالىق دامۋ مونيتورينگتىڭ قورىتىندىسى بويىنشا رەسپۋبليكادا 6561 اۋىلدىق ەلدى مەكەن بار. 2018 -جىلى قورىتىندىسى بويىنشا، وبلىستىق اكىمدىكتەردىڭ اقپاراتىنا سايكەس 94 اۋىلدىق ەلدى مەكەن «قازاقستان رەسپۋبليكاسىنىڭ اكىمشىلىك- اۋماقتىق قۇرىلىسى تۋرالى» زاڭىنا سايكەس بولاشاعى جوق دەپ تانىلدى. جابىلعان اۋىلداردىڭ باسىم بولىگى قىزىلوردا وبلىسىنا (28)، شىعىس قازاقستان وبلىسىنا (16) جانە سولتۇستىك قازاقستان وبلىسىنا (15) تيەسىلى»، - دەدى ۇلتتىق ەكونوميكا ۆيتسە-ءمينيسترى ەرمەك الپىسوۆ.
«ق ر اكىمشىلىك- اۋماقتىق قۇرىلىسى» تۋرالى زاڭنىڭ 8- جانە 11-بابىنىڭ 3-تارماعىنا سايكەس، وبلىستىق وكىلدىك جانە اتقارۋشى ورگاندار حالىق سانى 50 ادامنان كەم ەلدىمەكەندەردى تاراتۋ جۇمىسىن جۇرگىزەدى. سونداي-اق، ونداي ەلدىمەكەندەر اكىمشىلىك نەمەسە اۋماقتىق جاعىنان باسقا (ىرگەلى) ەلدى مەكەندەردىڭ قۇرامىندا ەسەپكە الىنادى.
«ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017 - 2021 -جىلدارعا ارنالعان «ەڭبەك» مەملەكەتتىك باعدارلاماسىنىڭ بارى بەلگىلى. ەڭبەك رەسۋرستارىنىڭ ۇتقىرلىعىن ارتتىرۋ شەڭبەرىندە باعدارلاماعا قاتىسۋشىلاردى ەكونوميكالىق دامۋ الەۋەتى تومەن اۋىلداردان وبلىستىق (اۋداندىق) ماڭىزى بار قالالارعا، ەكونوميكالىق ءوسۋ نۇكتەلەرىنە كوشىرۋ كوزدەلگەن. بۇل رەتتە كوش مەملەكەتتىك تۇرعىن ءۇي قورىنان تۇرعىن ۇيمەن نەمەسە جۇمىس بەرۋشىلەر ەسەبىنەن قامتاماسىز ەتۋ، تۇراقتى جۇمىس ورنىنا جۇمىسقا ورنالاستىرۋ مۇمكىندىگى بولعان كەزدە ەرىكتى تۇردە جۇرگىزىلەدى. وبلىسىشىلىك قونىس اۋدارۋ جەرگىلىكتى بيۋدجەت ەسەبىنەن جۇزەگە اسىرىلادى. ال رەسپۋبليكالىق بيۋدجەتتەن وڭتۇستىكتەن سولتۇستىككە كوشىرۋ اياسىندا ءىس- شارالار قارجىلاندىرىلادى»، - دەلىنگەن جاۋاپتا.
ەسكە سالا كەتسەك، وسىدان بىرنەشە كۇن بۇرىن ەلوردادا وتكەن باسپا ءسوز ءماسليحاتىندا ۇلتتىق ەكونوميكا ۆيتسە-ءمينيسترى ەرمەك الپىسوۆ قازاقستان حالقىنىڭ جالپى سانى 2025 -جىلعا قاراي 20 ميلليون ادامعا جەتەتىنىن بولجاعان بولاتىن. ۆيتسە-ءمينيستردىڭ پايىمداۋىنشا، اۋىل حالقىنىڭ سانى ءىس جۇزىندە 7,6 ميلليون دەڭگەيىندە قالادى دا، اۋىل حالقىنىڭ ۇلەسى 42 پايىزدان 38-گە دەيىن تومەندەيدى.
سونداي-اق، ەرمەك الپىسوۆ بولاشاعى جوق اۋىلداردىڭ حالقىنا مەملەكەت قانداي قولداۋ كورسەتەتىنىن ايتىپ بەرگەن ەدى.