ۇلتتىق بانك وتكەن ايدا 940 ميلليون دوللار ساتىپ الدى
«حالىق پەن كاسىپورىندار تەڭگە باعامىنىڭ وزگەرگەنىنە ەمەس، ونىڭ ءوز تەڭگەرىم نۇكتەسىن ىزدەي باستاۋىنا، ياعني ەكى تاراپقا كەزەك-كەزەك اۋىتقۋىنا نارازى بولدى. ول العاشقى كۇندەرى ايتارلىقتاي نىعايسا، ودان كەيىن قايتا قۇلدىرادى. پروبلەما ۇلتتىق بانكتىڭ قايتا ينتەرۆەنتسياعا كىرىسۋىنەن پايدا بولدى. سول ساتتە قالىپتاسقان باعام، مەنىڭشە، ءوز تەڭگەرىم نۇكتەسىن تابا العان جوق. ياعني، مۇناي باعاسى قايتا قۇلدىراي باستاپ، رەسەيلىك رۋبل قۇنسىزدانا باستادى. ال رەسەي - بىزدەر ءۇشىن ەڭ ءبىرىنشى كەزەكتە يمپورت بويىنشا نەگىزگى ساۋدا سەرىكتەسىمىز. ءبىزدىڭ ولارعا تاۋەلدىلىگىمىز بار، ءبىرىڭعاي ەكونوميكالىق وداقتامىز. سوعان سايكەس ءبىز ولاردىڭ اقشا-نەسيە ساياساتتارىنىڭ وزگەرۋىنە قاراي ارەكەت ەتۋگە ءماجبۇر بولدىق. سوندىقتان 5- قاراشادا ۇلتتىق بانك تاعى دا ۆاليۋتا نارىعىنا قاتىسۋىن ازايتاتىندىعى تۋرالى مالىمدەمە جاسادى. ول كەزدە باعام ءبىر دوللارعا 282 تەڭگە بولاتىن. ءبىز بۇل جايىندا جاريا ەتكەننەن كەيىن جانە 5- قاراشادان سوڭ باعام ءبىر دوللارعا 312-313 تەڭگەگە دەيىن السىرەدى»، - دەدى ۇلتتىق بانك ءتوراعاسى.
ونىڭ اتاپ وتۋىنشە، قاراشا ايىندا ۇلتتىق بانك ۆاليۋتا ساتىپ الدى. ويتكەنى، باستاپقى تومەندەۋدەن كەيىن تەڭگە باعامى قايتا نىعايا باستاعان ەدى. بانك بۇل قادامعا بيۋدجەت زارداپ شەكپەۋى ءۇشىن بارىپ وتىر. سەبەبى، ول ەكسپورتتاۋشىلاردىڭ ەسەبىنەن تولىعادى، ال ەكسپورت ءۇشىن تەڭگە باعامىنىڭ تومەن بولۋى ءتيىمدى. بۇعان قوسا، قازاقستاندىق تاۋارلار بارىنشا قىمباتتاپ كەتپەۋى ءۇشىن، ياعني وتاندىق تاۋار وندىرۋشىلەردىڭ باسەكەگە قابىلەتتىلىگىن قامتاماسىز ەتۋ ءۇشىن وسىنداي قادامعا بارۋعا تۋرا كەلدى. 1-30- قاراشا ارالىعىندا ۇلتتىق بانك 940 ميلليون دوللار ساتىپ الدى.
تولىقتاي العاندا، د. اقىشيەۆتىڭ سوزىنە قاراعاندا، قازىرگى ۋاقىتتاعى ۇلتتىق بانكتىڭ ساياساتى تەڭگە باعامىنىڭ كۇرت وزگەرۋىنە جول بەرمەۋ بولىپ تۇر. ايتا كەتەرلىگى، تەڭگە باعامىن تۇراقتى تۇردە ءبىر دەڭگەيدە ۇستاپ تۇرۋ دا ۇلتتىق بانكتىڭ ماقساتى ەمەس.
اۆتور: مارلان جيەمباي
