الماتى وبلىسىندا 94,4 مىڭ گەكتار جەر ءباسساۋدا ارقىلى ساتىلادى
بۇل تۋرالى بۇگىن «مەملەكەت باسشىسىنىڭ 5 ينستيتۋتتىق رەفورماسىن جۇزەگە اسىرۋ بويىنشا 100 ناقتى قادام» ۇلت جوسپارىن جۇزەگە اسىرۋ ماسەلەلەرىنە ارنالعان باسپا ءسوز ءماسليحاتى بارىسىندا اتالعان ءوڭىردىڭ باسشىسى اماندىق باتالوۆ ءمالىم ەتتى.
«35, 36-قادامدارعا سايكەس، اۋىل شارۋاشىلىعى باعىتىنداعى جەرلەردى نارىقتىق اينالىمعا ەنگىزۋ ءۇشىن تۇگەندەۋ جۇرگىزىلدى، ولاردى پايدالانۋدىڭ مونيتورينگىن جۇرگىزۋ ءۇشىن وبلىستىڭ ەلەكتروندىق جەر كارتاسى ازىرلەندى. ناتيجەسىندە پايدالانىلمايتىن 272,7 مىڭ گەكتار جەر انىقتالدى»، - دەدى وبلىس اكىمى.
ءوڭىر باسشىسى العا تارتقان دەرەكتەرگە سايكەس، ونىڭ ىشىندە 77,4 مىڭ گەكتار پايدالانىلا باستادى. ال 15,1 مىڭ گەكتار جەر اۋداندارعا قايتارىلىپ، يەسىز 53,9 مىڭ گەكتار بويىنشا ماتەريالدار ولاردى مەملەكەت مەنشىگىنە قايتارۋ ءۇشىن سوتقا بەرىلەدى. 14,4 مىڭ گەكتار مەملەكەت مەنشىگىنە قايتارىلىپ، الداعى ۋاقىتتا اۋكتسيونعا شىعارىلادى. سالىقتاردى ون ەسەلەنگەن كولەمدە ارتتىرۋ ءۇشىن سالىق ورگاندارىنا 111,9 مىڭ گەكتارعا 186 ماتەريال بەرىلدى.
«اۋكسيون ارقىلى ساتۋ ءۇشىن الاڭى 94,4 مىڭ گەكتار 651 جەر تەلىمى تاڭدالدى، قۇجاتتاردى راسىمدەۋگە 59,8 ميلليون تەڭگە قاراستىرۋ كوزدەلۋدە. 2016 -جىلدىڭ 1 -شىلدەسىنەن باستاپ جەردى جالعا پايدالانۋشى تۇلعالار ونى 10 جىل مەرزىمگە ءبولىپ تولەۋمەن، كاداسترلىق قۇنىنان 50 پايىز جەڭىلدىكپەن ساتىپ الۋ مۇمكىندىگىنە يە بولادى. بۇگىنگى تاڭدا 9,7 مىڭ گەكتار جەر ساتىپ الۋعا 211 ءوتىنىش بەرىلدى»، - دەدى ا. باتالوۆ.
