ماقتاارالداعى سۋ باسقان اۋىلداردان 931 باس مال ولەكسەسى شىعارىلدى
بۇل تۋرالى وبلىستىق اۋىل شارۋاشىلىق باسقارماسى ۆەتەريناريالىق شارالاردى ۇيىمداستىرۋ ءبولىمىنىڭ باس مامانى ارمان تاعايەۆ مالىمدەدى، دەپ حابارلايدى قازاقپارات ءتىلشىسى.
وڭىرلىك كوممۋنيكاتسيالار قىزمەتىندە وتكەن بريفينگتە باس مامان توپان سۋ باسقان 5 اۋىلدا مال اۋرۋ تۇرلەرىنىڭ تارالۋ قاۋىپى جوق ەكەنىن اتاپ ءوتتى.
ونىڭ سوزىنشە، توپان سۋ باسقان اۋىلداردان جالپى 931 باس مال ولەكسەسى شىعارىلعان. ونىڭ 40 ى ءىرى قارا، 876 سى ۋاق مال، 9 ى جىلقى، 6 ۋى تۇيە.
«توتەنشە جاعدايدان كەلگەن زارداپتارىن جويۋ ماقساتىندا وبلىستىق اۋىل شارۋاشىلىعى باسقارماسى، ماقتاارال اۋداندىق اۋماقتىق ينسپەكتسياسى جانە ماقتاارال اۋداندىق «ۆەتەريناريالىق قىزمەتى» وكىلدەرىنەن ارنايى كوميسسياسى قۇرىلعان بولاتىن. جۇمىس بارىسىندا مال ولەكسەلەرىنىڭ سانى انىقتالىپ، ونىڭ كوپشىلىگى وزبەكستاننان اعىپ كەلگەنى بەلگىلى بولدى. قازىرگى تاڭدا ماقتاارالدىقتاردىڭ 46 باس اۋىل شارۋاشىلىعى جانۋارلارى مەن 98 باس ءۇي قۇستارى ولگەنى انىقتالىپ وتىر. كەتكەن شىعىن تولىعىمەن ەسەپتەلىپ، ناتيجەسىندە 10,6 ميلليون تەڭگە وبلىستىق قوردان تولەۋ جولدارى قاراستىرىلۋدا»، - دەدى ا. تاعايەۆ.
ايتا كەتەيىك، بۇگىنگى تاڭعا توپان سۋ شايعان ايماقتاردا اۋرۋدىڭ تارالۋىن بولدىرماۋ ماقساتىندا 1 018,5 مىڭ شارشى مەتر اۋماق زالالسىزداندىرىلعان. بۇل جۇمىستاردى اتقارۋعا بارلىعى 39 مامان مەن 16 تەحنيكا جۇمىلدىرىلعان. سونداي-اق، اۋداندا ۆەتەريناريالىق قاۋىپسىزدىكتى قامتاماسىز ەتۋ ءۇشىن ولەكسەدەن تازارتىلعان اۋماقتاردى 3 پايىز كاۋستيكالىق سودامەن زالالسىزداندىرۋ جۇمىستارى جۇرگىزىلۋدە.
