ساپاسىز ينتەرنەت ءۇشىن بايلانىس وپەراتورلارى 92 ميلليون تەڭگە ايىپپۇل تولەدى
«قازىر بارلىق اۋىلعا ينتەرنەت جەتكىزۋ ماسەلەسى اشىق تۇر. ازىرگە 5163 اۋىلدىق ەلدى مەكەن مەن قالالاردا ينتەرنەت بار دەيمىز، ءبىراق 768 اۋىلدا ينتەرنەت ساپاسى تومەن. بۇرىن نەگە ينتەرنەت ساپاسى جونىندەگى سۇراقتارعا جاۋاپ بەرە المادىق؟ ويتكەنى، جالپى ەڭ تومەنگى دەڭگەيدەگى پارامەترلەر بەلگىلەنبەگەن ەدى. مەن وسى جىلدىڭ باسىندا ءوز بۇيرىعىممەن ەڭ تومەنگى پارامەترلەردى بەلگىلەدىم، ول 3G ءۇشىن - 1,5 مەگابيت، 4G ءۇشىن - 5 مەگابيت بولدى. بۇرىن تەكسەرۋ جۇرگىزگەندە 3G بولسا، ينتەرنەت بار دەپ ەسەپتەلەتىن. ال قازىر وسى پارامەترلەرگە ساي كەلە مە، وسىنى باقىلايمىز»، - دەدى مينيستر ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ۆەدومستۆو باسشىسىنىڭ ايتۋىنشا، جىل باسىنان بەرى ينتەرنەت ساپاسىنا 400 دەن استام تەكسەرۋ جۇمىستارى جۇرگىزىلگەن جانە ولاردىڭ 80 پايىزىندا ساپا اتالعان پارامەترلەرگە ساي كەلمەيتىنى انىقتالعان.
«2020، 2019-جىلدارى مۇنداي تەكسەرۋلەر سانى جۇزگە دە جەتپەيتىن. وسىلايشا، ءبىز تەكسەرۋ جۇمىستارىن كوبەيتىپ، ينتەرنەتتىڭ ءتيىستى ساپاسىن قامتاماسىز ەتپەگەن وپەراتورلارعا ايىپپۇلدار بەردىك. وسى 3-4 ايدىڭ ىشىندە وپەراتورلار بۇل ماسەلەنى شەشپەسە، ايىپپۇلدار كولەمى ەكى ەسە ۇلعايادى. قازىر دەپۋتاتتارمەن بىرلەسىپ، ايىپپۇلدار كولەمىن 100 ا ە ك- تەن 1000 ا ە ك- كە (2 917000) دەيىن ءوسىرىپ جاتىرمىز. بيىل 92 ميلليون تەڭگە ايىپپۇل بەرسەك، 10 ەسە وسكەن ايىپپۇل ءبىر جىلدا 1-2 ميلليارد تەڭگە سوماسىندا جينالادى دەپ ويلايمىز. ارينە، بۇل وتە قوماقتى سوما. سوندىقتان، وپەراتورلار ينتەرنەت ساپاسىن ارتتىرۋعا بار كۇش-جىگەرىن سالادى دەپ ۇمىتتەنەمىن»، - دەدى ب. مۋسين.
سونىمەن بىرگە، مينيستر ينتەرنەت ساپاسىن ارتتىرۋ ماقساتىندا راديوجيىلىكتەر بەرىلەتىنىن اتاپ ءوتتى.
«اۋىل شارۋاشىلىعىنا جەر قانداي كەرەك بولسا، بايلانىس وپەراتورلارى ءۇشىن دە راديوجيىلىك كەرەك. ونى كوزبەن كورە المايمىز، ءبىراق ينتەرنەت راديوجيىلىكتەر ارقىلى جۇمىس ىستەيدى. ونى ءبىزدىڭ مينيسترلىك تاراتادى. بيىل راديوجيىلىك ليتسەنزيالارىن قايتا جيناپ، جاڭاسىن تاعايىندادىق. الداعى ەكى جىلدا اتالعان 768 اۋىلدا ينتەرنەت ساپاسى جاقسارتىلادى. ەكىنشىدەن ۇلتتىق جوبا اياسىندا ەڭ تومەنگى پارامەترلەردى 4 جىلدا 10 مەگابيتكە دەيىن كوتەرەمىز. وبلىس ورتالىقتارى مەن قالالاردا 5G بايلانىسىن وتكىزەتىن بولامىز»، - دەپ تولىقتىردى ب. مۋسين.