تالدىقورعاندا مەملەكەتتىك تۋ 92 مەتر بيىكتىككە كوتەرىلدى - فوتو
بۇل بيىكتىك ولشەمى قازاقستان تاۋەلسىزدىگىنىڭ جاڭا مەملەكەتىك سيمۆولدارى بەكىتىلگەن 1992-جىلعا نەگىزدەلىپ الىنعان.
مەرەكەلىك شارا قازاقستاننىڭ تاۋەلسىزدىككە قول جەتكىزۋگە دەيىنگى تاريحي جولدارى بەينەلەنگەن تەاترلاندىرىلعان كورىنىسپەن باستالىپ، بالاباقشا تاربيەلەنۋشىلەرى وتان، مەملەكەتتىك رامىزدەر، تاۋەلسىزدىك تۋرالى ولەڭ-تاقپاقتارىن وقىدى، دەپ حابارلايدى الماتى وبلىسى اكىمدىگىنىڭ باسپا ءسوز قىزمەتىنەن.
تۋدى كوتەرەر الدىندا وبلىس اكىمى اماندىق باتالوۆ جينالعانداردى سالتاناتتى شارامەن قۇتتىقتاپ:
«بۇگىن قازاقستان رەسپۋبليكاسىنىڭ مەملەكەتتىك رامىزدەر كۇنى قارساڭىندا جەتىسۋدىڭ باس قالاسى تالدىقورعاندا مەملەكەتتىك تۋ تۇعىرىنا ورناتىلىپ، سالتاناتتى تۇردە كوتەرىلەدى. وسىنداي مەملەكەتتىك تۋ استانا، الماتى سياقتى ەلىمىزدىڭ ءىرى قالالارىندا ورناتىلعان. بۇدان بىلاي مەملەكەتتىك مەرەكەلەر وسى تۋ تۇعىرىنىڭ استىندا وتەتىن بولادى.
كوك تۋدىڭ تۇعىرىن بيىكتەتۋ - قازاقستاننىڭ ەرتەڭگى تىزگىنىن ۇستايتىن، بولاشاقتىڭ يەسى - جاستارعا امانات»، - دەدى ءوز سوزىندە.
وبلىس باسشىسى، سونىمەن قاتار ءبىزدىڭ مەملەكەتتىك تۋىمىزدىڭ ىنتىماعى مەن بىرلىگى جاراسقان ەلدىڭ سيمۆولىنا اينالعانىن دا اتاپ ءوتتى.
«ەلباسىمىز نۇرسۇلتان ءابىش ۇلى: «ءبىز تاۋەلسىزدىككە قول جەتكىزدىك، ەندى سول تاۋەلسىزدىكتىڭ قاسيەتتى بەلگىلەرىن دە ەرەكشە قادىرلەۋىمىز كەرەك. ءاربىر ازامات قازاقستاننىڭ تۋىن، ەلتاڭباسىن، ءانۇرانىن تۇمارداي قاسيەت تۇتۋى قاجەت»، - دەپ اتاپ وتكەندەي، ءبىز ءۇشىن مەملەكەتتىك رامىزدەر - ۇلتتىق تۇتاستىقتىڭ كەپىلى.
دانا حالقىمىز «تۋعان جەرگە تۋىڭدى تىك» دەيدى. ولاي بولسا، جەتىسۋداي جەر جانناتىندا الىپ تۋ تىگۋ - ءبىز ءۇشىن اسقان ابىروي، زور مارتەبە. تۋدىڭ كەڭدىگى - ەلىمىزدىڭ دارحاندىعى، بيىكتىگى - مارتەبەسىنىڭ اسقاقتاۋى دەپ بىلەمىز. تۋىمىز تۇعىرلى، تاۋەلسىزدىگىمىز عۇمىرلى بولسىن! - دەدى ىزگى تىلەگىن ءبىلدىرىپ.
«كوك تۋدىڭ جەلبىرەگەنى» جانە «قازاقستان - نۇرسۇلتان» پاتريوتتىق اندەرى بەلگىلى ءانشى يبراگيم ەسكەندىر مەن «تالدىقورعان اۋەندەرى» ءانسامبلى انشىلەرىنىڭ ورىنداۋىندا شىرقالسا، بۇدان ءارى مەرەكە ساياباقتىڭ نەگىزگى ساحناسىندا جالعاسىپ، ءسۇيىنباي اتىنداعى وبلىستىق فيلارمونيا، «تالدىقورعان اۋەندەرى» ءانسامبلى، قازاقستان ەستراداسىنىڭ ونەرپازدارى ءان مەن جىردان شاشۋ شاشتى.
