قازاقستاننىڭ حالىقارالىق اكتيۆتەرى 92.5 ميلليارد دوللارعا جەتتى
بۇگىن پارلامەنت ءماجىلىسىنىڭ جالپى وتىرىسىندا ق ر ۇلتتىق بانكىنىڭ ءتوراعاسى دانيار اقىشيەۆ وسىلاي ءمالىم ەتتى.
ەسكە سالا كەتەيىك، جالپى وتىرىستا «2015-2017 -جىلدارعا ارنالعان رەسپۋبليكالىق بيۋدجەت تۋرالى» زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.
«قازان ايىنىڭ سوڭىندا ۇلتتىق بانكتىڭ حالىقارالىق رەزەرۆتەرى 28.7 ميلليارد دوللاردى قۇرادى. ۇلتتىق قوردىڭ شەتەل ۆاليۋتاسىنداعى اكتيۆتەرى 63,9 ميلليارد دوللاردى قۇرادى. تۇتاستاي العاندا ەلىمىزدىڭ حالىقارالىق اكتيۆتەرى 92,5 ميلليارد دوللارعا جەتتى» ، - دەيدى ۇلتتىق بانك باسشىسى.
ونىڭ ايتۋىنشا، 2015 -جىلدىڭ 10 ايىندا دەپوزيتتەر 14,6 تريلليون تەڭگەگە دەيىن نەمەسە 24,6 پايىزعا وسكەن. سونىمەن قاتار، شەتەل ۆاليۋتاسىن دەپوزيتتەر ۇلەسى 55 پايىزدان 66 پايىزعا دەيىن ارتقان. «بۇل ۇلتتىق ۆاليۋتانىڭ السىرەۋىنەن كەيىن قايتا باعالاۋعا بايلانىستى بولدى. بانكتەردىڭ ەكونوميكاداعى كرەديتتەر كولەمى 12 تريلليون تەڭگەنى قۇراپ وتىر. قازىرگى كۇنى كرەديتتەردى جانداندىرۋ جۇمىسى جالعاساتىن بولادى»، - دەدى د. اقىشيەۆ.
اۆتور: قانات مامەتقازى ۇلى
