سەرىك جۇمانعارين: قازاقستاندا اي-92 ماركالى بەنزينىنىڭ باعاسى 170 تەڭگەدەن اسپايدى

«جانار- جاعارماي باعاسى ءوسىمىنىڭ ەكونوميكالىق نەگىزىن قاراساق، بىرىنشىدەن، بىلتىر اكسيز كوتەرىلدى، سوسىن زاۋىتتىڭ ءوندىرۋ باعالارى جوعارىلادى. ونى بىلتىر ەشقايسىسى ءونىم قۇنىنا ەنگىزبەدى. سەبەبى تۇتىنۋ كولەمى ازايىپ، وتكەن جىلى جانار- جاعارماي قۇنى تومەندەدى. وسى ورايدا كەيىنگە شەگەرىلگەن باعا ءتارتىبى بيىل قوسىلدى. ەكىنشىدەن، اتىراۋ مۇناي وڭدەۋ زاۋىتى توقتاپ قالدى. 5 - ساۋىردە جوندەۋ جۇمىستارى اياقتالۋى ءتيىس ەدى، ءبىراق ىسكە قوسىلمادى. ەندى وسى ايدىڭ اياعىنا دەيىن (24 -ساۋىرگە دەيىن) تۇرۋى مۇمكىن. بۇل تۇرعىدا اي-92 ماركالى بەنزينىن ءوندىرۋ ەكى ەسە ازايدى»، - دەدى س. جۇمانعارين.

سونىمەن قاتار، ول رەسەيدە اي-92 ماركالى بەنزيننىڭ قۇنى قازاقستانعا قاراعاندا قىمباتتاۋ ەكەنىن ايتا كەلە، سول سەبەپتى بەنزين بىزدەن كەتىپ جاتقانىن ايتتى.

«تىيىم سالىنسا دا، ءبارىبىر كەتىپ جاتىر. ءبىز ءوز تاراپىمىزدان ءار ءوڭىر بويىنشا نارىققا زەرتتەۋ جاسادىق. وسى ورايدا باعانىڭ وزىندىك قۇنىنا قاتىستى تالداۋ جۇرگىزدىك، بيزنەسپەن پىكىر الماستىق. وڭىرلەر بويىنشا باعا ايىرماشىلىعى بايقالىپ وتىر. تاسىمالداۋداعى جول شىعىنى تومەندەۋ وڭىرلەردە باعا دا ارزانداۋ. ءبىزدىڭ ويىمىزشا، وسى ايدا جانە مامىر ايىندا باعانى 170 تەڭگەدەن اسىرعىزبايمىز»، - دەدى اگەنتتىك باسشىسى.

ونىڭ ايتۋىنشا، كەستە بويىنشا شىمكەنت مۇناي وڭدەۋ زاۋىتى مامىر ايىندا جوندەۋ جۇمىستارىنا تۇرۋى ءتيىس ەدى. الايدا بۇل زاۋىت جوندەۋگە تۇرىپ قالسا، جاعداي قيىنداۋى ىقتيمال. بۇل ءوندىرىس وڭتۇستىك وڭىردەگى باعاعا اسەر ەتەدى.

«دەگەنمەن بەنزين باعاسى 200 تەڭگە (اي-92) بولمايدى. بۇل باعىتتا ءتيىستى جۇمىستار اتقارىلىپ جاتىر، حاتتامالاردى جانار- جاعارماي قۇيۋ ستانسيالارىنا تاپسىردىق. ونى ورىنداماسا، وندا تەكسەرۋ امالدارى باستالادى»، - دەدى سەرىك جۇمانعارين.

بۇدان بۇرىن حابارلانعانداي، 12 - ساۋىردە ۇكىمەت وتىرىسىندا ق ر ەنەرگەتيكا ءمينيسترى نۇرلان نوعايەۆ اتىراۋ مۇناي وڭدەۋ زاۋىتىن 24 - ساۋىردە ىسكە قوسۋ جوسپارلانىپ وتىرعانىن ايتتى.

اۆتور: رۋسلان عابباسوۆ