كونستيتۋتسيانىڭ 91-بابىنا ەشقاشان، ەشقانداي وزگەرىس ەنگىزىلمەيدى - جاقسىبەكوۆ
بۇل جايىندا بۇگىن پارلامەنت پالاتالارىنىڭ بىرلەسكەن وتىرىسىندا ق ر پرەزيدەنتى اكىمشىلىگىنىڭ باسشىسى، بيلىك تارماقتارى اراسىنداعى وكىلەتتىكتى قايتا ءبولۋ جونىندەگى جۇمىس توبىنىڭ جەتەكشىسى ادىلبەك جاقسىبەكوۆ ءمالىم ەتتى، دەپ حابارلايدى قازاقپارات.
وتىرىس بارىسىندا ءماجىلىس دەپۋتاتى باقىتجان ءابدىرايىم حالىقپەن كەزدەسۋلەر بارىسىندا ەڭكەيگەن قارتتان كىشكەنە بالاعا دەيىن تاۋەلسىزدىگىمىزدى قورعاۋ ماسەلەسىنە قاتىستى ءارتۇرلى سۇراقتار قوياتىندىعىن اتاپ ءوتتى.
«جالپى، جۇرتشىلىق كونستيتۋتسيانىڭ 91-بابىنا وزگەرىستەر ەنگىزۋدى تولىقتاي قولداپ وتىر. وسىعان وراي تاۋەلسىزدىگىمىزدى، ياعني مەملەكەتتىك تاۋەلسىزدىگىمىزدى قورعاۋ جانە قامتاماسىز ەتۋ ءۇشىن جۇمىس توبى ناقتى قانداي شارالار ۇسىنادى؟» - دەپ سۇرادى باقىتجان ءابدىرايىم پرەزيدەنت اكىمىشىلىگى باسشىسىنان.
«بۇل تۋرالى باياندامادا دا ايتتىم. وسى ماسەلە بويىنشا بىزگە دە كوپتەگەن سۇراقتار قويىلدى، ۇسىنىستار كەلدى. سوندىقتان پرەزيدەنت 91-باپقا تاۋەلسىزدىك نەگىزگى قۇندىلىق دەپ ەنگىزدى. ءبىز بۇل ماسەلەنى وسىلاي شەشتىك. وسى باپقا ەشقاشان، ەشقانداي وزگەرىس جاسالمايدى»، - دەپ جاۋاپ بەردى ادىلبەك جاقسىبەكوۆ.
اۆتور: مارلان جيەمباي
