قىرعىزستان اۋرۋحانالارىنا ميتينگ كەزىندە زارداپ شەككەن 911 ادام جۇگىنگەن

بۇل تۋرالى قازاقپارات قىرعىزستاننىڭ كابار اگەنتتىگىنە سىلتەمە جاساپ حابارلايدى.

ۆەدومستۆو مالىمەتتەردىڭ 7-قازان كۇنگى ساعات 12:30 عا كەلتىرىلگەنىن اتاپ ءوتتى. كومەككە جۇگىنگەن 911 ادامنىڭ ىشىندە زارداپ شەككەن 705 ادام العاشقى مەديتسينالىق كومەك كورسەتىلگەن سوڭ امبۋلاتورلىق ەم قابىلداۋعا جىبەرىلدى.

ءتۇرلى جاراقاتتار الىپ زارداپ شەككەن 205 ادام اۋرۋحاناعا جاتقىزىلدى، سونىڭ ىشىندە بەسەۋى جانساقتاۋ بولىمىندە جاتىر. ۇلتتىق گوسپيتالدا 2001 -جىلعى ەر ادام قايتىس بولدى.

وسىلايشا، بىشكەكتەگى تراۆماتولوگيا جانە ورتوپەديا عىلىمي-زەرتتەۋ ورتالىعىنا بارلىعى زارداپ شەككەن 452 ادام كەلىپ تۇسكەن، سونىڭ ىشىندە 82 ادام اۋرۋحاناعا جاتقىزىلدى، ءبىر ادام جانساقتاۋ بولىمىندە جاتىر.

ۇلتتىق گوسپيتالعا 269 ادام كەلىپ تۇسكەن، سونىڭ ىشىندە 85 ادام اۋرۋحاناعا جاتقىزىلدى. 4 پاتسيەنت جانساقتاۋ بولىمىندە جاتىر، ءبىر ادام قايتىس بولدى.

1-قالالىق كلينيكالىق ەمحاناعا 58 ادام كەلىپ ءتۇستى، 48 ادام امبۋلاتورلىق ەم الۋعا جىبەرىلدى. 10 ادام اۋرۋحاناعا جاتقىزىلدى. شۋ وبلىستىق اۋرۋحاناسىنا زارداپ شەككەن 112 ادام كەلىپ ءتۇستى. 100 ادام امبۋلاتورلىق ەم قابىلداۋعا جىبەرىلدى. 12 ادام اۋرۋحاناعا جاتقىزىلدى. ۇلتتىق حيرۋرگيا ورتالىعىنا زارداپ شەككەن 20 ادام جەتكىزىلگەن، سونىڭ ىشىندە تورتەۋى امبۋلاتورلىق ەم الۋعا جىبەرىلدى، 16 ادام اۋرۋحاناعا جاتقىزىلدى.

بارلىق پاتسيەنتتەرگە قاجەتتى مەديتسينالىق كومەك كورسەتىلىپ جاتىر. ءتيىستى مامانداردىڭ كەڭەسى بەرىلۋدە، زارداپ شەككەندەر بارلىق قاجەتتى ءدارى- دارمەكتەرمەن قامتاماسىز ەتىلدى. ايتا كەتەيىك، جەكسەنبى، 4-قازان كۇنى قىرعىزستاندا جوگوركۋ كەنەشكە دەپۋتاتتارىنىڭ سايلاۋى ءوتتى. دەپۋتاتتىق مانداتقا 16 پارتيا ۇمىتكەرلىك ەتتى. داۋىس بەرۋدىڭ الدىن الا مالىمەتى بويىنشى، %7 مەجەنى 4 پارتيا ەڭسەردى.

ال، 5-قازان كۇنى سايلاۋ ناتيجەسىنە كوڭىلى تولماعان ءبىر توپ ادام ورتالىق الاڭدا ميتينگ ۇيىمداستىرىپ، ونىڭ سوڭى جاپپاي تارتىپسىزدىكتەرگە ۇلاستى.

اۆتور: زارينا تۋعانبايەۆا