اتىراۋ وبلىسىندا جىل باسىنان بەرى 90 عا جۋىق بالا جوعالعان
وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، جىل باسىنان بەرى كامەلەتكە تولماعان بالالاردىڭ جوعالۋىنا بايلانىستى 89 دەرەك تىركەلگەن.
«اتىراۋ وبلىسىندا بالالاردىڭ جوعالۋ دەرەگى كوبەيىپ وتىر. بيىلعى جىل باسىنان بەرى بالالاردىڭ جوعالۋىنا بايلانىستى 89 دەرەگى تىركەلدى. بۇل - الاڭداتارلىق جايت. پوليتسيا قىزمەتكەرلەرىنە بالالارى ۇيىنە ورالماعاننان كەيىن 73 اتا-انا حابار بەرگەن. مەكتەپ قىزمەتكەرلەرىنەن 6 حابار ءتۇستى. تۇرعىلىقتى مەكەن-جايىن تابا الماي اداسقان بالالار تۋرالى 9 ادام حابار بەردى»، - دەيدى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى، پوليتسيا پودپولكوۆنيگى ابزال الىپقاليەۆ.
ونىڭ ايتۋىنشا، اتا-انالار كامەلەتكە تولماعان جاسوسپىرىمدەر ۇيگە كەلمەگەن جاعدايدا، ءوز ەركىمەن ىزدەستىرۋ جۇمىستارىن ۇزاققا سوزباي، دەرەۋ پوليتسياعا حابار بەرگەنى ءجون.
«بۇل جوعالعان بالالاردى ىزدەستىرۋ جۇمىستارىنىڭ ءساتتى اياقتالۋىنا ءوز سەپتىگىن تيگىزەدى. كوپ جاعدايدا اتا-انالار بالالارىنىڭ ۇيگە كەلۋىن كۇتىپ، وقيعانى جاسىرۋعا تىرىسادى. ماسەلەن، ءبىر اتا-انانىڭ بالاسى ساباققا بارۋ ءۇشىن كۇندىزگى 12:00 دە ۇيىنەن شىعىپ كەتكەن. الايدا، ساباقتان كەيىن ۇيىنە ۋاقىتىلى كەلمەگەن. ءبىراق، بۇل تۋرالى اتا-اناسى پوليتسيا قىزمەتكەرلەرىنە تۇنگى 01:30 شاماسىندا عانا حابارلادى. مۇنداي جايت بالانى دەرەۋ ىزدەستىرۋگە قيىندىق كەلتىرەدى. دەگەنمەن، پوليتسيا قىزمەتكەرلەرى جوعالعان بالانى تاۋىپ، اتا-اناسىنا امان-ەسەن تاپسىردى»، - دەپ ءمالىم ەتتى ابزال الىپقاليەۆ.
ەسكە سالا كەتەلىك، بۇعان دەيىن اتىراۋ وبلىسىندا 173 جاس ءوسپىرىم ەرتە جۇكتىلىك ەسەبىنە الىنعانىن حابارلاعان بولاتىنبىز.
