شەرحان مۇرتازانىڭ 90 جىلدىعىن جوعارى دەڭگەيدە ۇيىمداستىرۋ كەرەك – سەناتور
بۇل تۋرالى دەپۋتات پرەمەر- مينيستر ءاليحان سمايىلوۆتىڭ اتىنا دەپۋتاتتىق ساۋال جولدادى. كورنەكتى تۇلعانىڭ مەرەيتويىن لايىقتى اتاپ ءوتۋ ءۇشىن سەناتور حالىق جازۋشىسىنىڭ ءومىرى مەن شىعارماشىلىعى تۋرالى دەرەكتى فيلم ءتۇسىرۋدى ۇسىندى. سونىمەن قاتار، دەپۋتات حالىقارالىق عىلىمي- پراكتيكالىق كونفەرەنتسيا، تانىمدىق ءىس- شارالار وتكىزۋدى، نۇر- سۇلتان مەن الماتى قالالارىنداعى كوشەلەرگە، سونداي- اق ەلورداداعى جاڭادان بوي كوتەرگەن مەكتەپتەردىڭ بىرىنە جازۋشىنىڭ ەسىمىن بەرۋدى ۇسىندى.
«بۇكىل عۇمىرىن ۇلتتىق مادەنيەت پەن ادەبيەتتىڭ دامۋىنا ارناپ، كەيىنگى ۇرپاققا رۋحاني باي مۇرا قالدىرعان قالامگەر شەرحان مۇرتازا پارلامەنتتىڭ تورىندە ەلدىڭ ءسوزىن سۇڭقارداي داۋسى ساڭقىلداپ سويلەدى. ەل، جەر، ءتىل ماسەلەلەرىن وتكىر كوتەردى. جازۋشى شىعارماشىلىعىن كەڭىنەن ناسيحاتتاۋ جاستاردىڭ رۋحاني- ادامگەرشىلىك دامۋىنا وڭ اسەر ەتىپ، تۇلعا بولىپ قالىپتاسۋىنا زور سەپتىگىن تيگىزەدى»، - دەدى ا. نۇراليەۆ.
ايتا كەتەيىك، حالىق جازۋشىسى شەرحان مۇرتازانىڭ جۋالى اۋدانى تالاپتى اۋىلىندا تۇرعان ءۇيى مۋزەيگە اينالادى. بۇدان بولەك وڭىردەگى ءتورت مەكتەپ قابىرعالى قالامگەردىڭ ەسىمىن ەنشىلەگەن. ءبىرتۋار تۇلعانىڭ ەسكەرتكىشىن سالۋ ماسەلەسى دە قارالىپ جاتىر.
