تاۋەلسىزدىك جىلدارى قازاقستاننىڭ حالىقارالىق رەزەرۆتەرى 90 ميلليارد دوللاردان استى
«اۋقىمدى رەفورمالاردىڭ ارقاسىندا وتاندىق ەكونوميكانىڭ كولەمى ناقتى ماندە 2,5 ەسە ۇلعايدى. حالىقتىڭ جان باسىنا شاققانداعى جالپى ىشكى ءونىمى دوللار ەكۆيۆالەنتىندە 13 ەسەدەن استام ءوستى. بۇل ءبىزدىڭ ەلدى ورتالىق ازيادا ءسوزسىز كوشباسشى ەتتى. قازاقستانعا 370 ميلليارد دوللاردان استام تىكەلەي شەتەلدىك ينۆەستيتسيا تارتىلدى. بۇل كورسەتكىش بويىنشا جان باسىنا شاققاندا ءبىز بارلىق پوستكەڭەستىك كەڭىستىك پەن ءبىرقاتار شىعىس ەۋروپا ەلدەرىنەن وزامىز. قازاقستاننىڭ حالىقارالىق رەزەرۆتەرى 90 ميلليارد دوللاردان اسادى»، - دەدى مەملەكەت باسشىسى.
ونىڭ ايتۋىنشا، ەلىمىز وڭىرلەردى، كولىك ينفراقۇرىلىمىن، الەۋمەتتىك سالانى دامىتۋدا ەلەۋلى تابىستارعا قول جەتكىزىپ، سونىڭ ارقاسىندا 13 مىڭ شاقىرىم اۆتوجول مەن 2 مىڭ 700 شاقىرىم تەمىر جول سالىندى جانە رەكونسترۋكسيالانعان.
تاۋەلسىزدىگىمىزدىڭ تابىسىنا توقمەيىلسۋگە بولمايدى.
«جاڭا جاھاندىق جانە وڭىرلىك سىن- تەگەۋىرىن جاعدايىندا تاۋەلسىزدىك جەتىستىكتەرىن ەسەلەۋ ءۇشىن بىزگە كۇش- جىگەرىمىزدى ەكى، ءتىپتى ءۇش ەسەلەۋ قاجەت. باسقا سوزبەن ايتار بولساق، تابىسىمىزعا توقمەيىلسۋگە بولمايدى»، - دەپ اتاپ ءوتتى ق ر پرەزيدەنتى. مەملەكەت باسشىسى الەۋمەتتىك- ەكونوميكالىق ءومىردىڭ بارلىق سالاسىندا جانكەشتى كۇندەلىكتى جۇمىستىڭ قاجەت ەكەندىگىن باسا ايتتى.
«ءبىزدىڭ الدىمىزدا ازاماتتاردىڭ ءومىر ساپاسىن ارتتىرۋعا قاتىستى جاڭا مىندەتتەر تۇر. ءبىز «ادام مەملەكەت ءۇشىن ەمەس، مەملەكەت ادام ءۇشىن» نەگىزگى قالاۋشى قاعيداتىنان تايمايتىن بولامىز. قوعامىمىز «حالىق ۇنىنە قۇلاق اساتىن» تۇجىرىمداماسىن زور ۇمىتپەن قابىلدادى. سوندىقتان مەملەكەتتىك قىزمەتشىلەر ازاماتتاردىڭ سەنىمىن اقتاپ، قالاۋلارىن ەسكەرۋ ءۇشىن بار كۇش- جىگەرلەرىن جۇمساۋى ءتيىس»، - دەدى قاسىم- جومارت توقايەۆ.
اۆتور: مارلان جيەمباي
