90 مىڭ تەڭگە ايلىق الامىز - شارىن شاتقالىنىڭ ينسپەكتورى
مەملەكەتتىك ينسپەكتور قازبەك قويشىبايەۆ پارك قۇرىلعالى قىزمەت ەتىپ كەلەدى. ايتۋىنشا قازىر قاراقۇيرىق سانى ەداۋىر وسكەن. باسقا دا اڭ-قۇستىڭ كوبەيگەنىن كوزبەن كورىپ كەلەدى. قورشاعان ورتانى قورعاۋ ءۇشىن كۇندىز- ءتۇن ات ۇستىندە جۇرەدى. باقىلايدى. جۇمىسى وزىنە ۇنايدى. الايدا ءبىر اتتەگەن- ايى جالاقىسى تومەن.
«ءبىز مىنا جۇمىستى باستاعان كەزدە ايلىعىمىز 7 مىڭ تەڭگە بولدى. قازىر 80-90 مىڭ تەڭگە الامىز، بۇل از. بىزدىكى قالىپتى جۇمىس ەمەس، كۇن- ءتۇنى جۇرەسىڭ»، - دەدى مەملەكەتتىك ينسپەكتور قازبەك قويشىبايەۆ.
شارىن شاتقالىنىڭ اۋماعى 127 مىڭ گەكتاردان اسادى. ۇلتتىق پارك بولىپ قۇرىلعالى ەرەكشە قورعالادى. شارىن شاتقالىنىڭ تاعى ءبىر بايلىعى جانۋارلار دۇنيەسى. سۇتقورەكتىلەردىڭ 30 دان استام ءتۇرى بار. باۋىرىمەن جورعالاۋشىلاردىڭ 18 ءتۇرى، قوسمەكەندىلەردىڭ 4 ءتۇرى جانە 100 دەن اسا قۇس ءتۇرى مەكەندەيدى. ولاردىڭ جويىلىپ كەتپەۋىنە جانە براكونەرلەردىڭ نىساناسىنا اينالماۋىنا 20 مەملەكەتتىك ينسپەكتور جاۋاپتى. فوتو جانە بەينە تۇزاقتار قويىلعالى پارك اۋماعىندا وزگە دە تىرشىلىك يەلەرىنىڭ بار ەكەنى دالەلدەندى.
شارىن شاتقالىندا تۋريزمدى دامىتۋدىڭ كەشەندى جوسپارى قۇرىلعان. قازىرگى تاڭدا ارنايى قاۋلى قابىلدانىپ، شاتقالدىڭ ينفراقۇرىلىمىن قولعا الاتىن ينۆەستورلار قاراستىرىلۋدا.
«تۋريستىك سوقپاقتاردى جانە دە تۋريستىك ورىنداردى جاقسارتۋ ماقساتىندا ۇلتتىق تابيعي پاركتە 2 ۆيزيت ورتالىعى، ءبىر گلەمپينگ، ءبىر كەمپينگ، زيپلاين اتراكسيونى جانە دە بالالار وينايتىن الاڭدار، سونىمەن قاتار قوناق ءۇي، ەكى قوناق ءۇي جانەدە مەيرامحانالار جاسالۋعا نەگىزدەلگەن جوبا جاسالىندى. قازىرگى ۋاقىتتا تەندەرگە قاتىساتىن ينۆەستورلارمەن جانە دە وبشەستۆەننيكتاردىڭ ۇسىنىستارىن قابىلداۋدامىز»، - دەدى «شارىن شاتقالى» مەملەكەتتىك ۇلتتىق تابيعي پاركىنىڭ ديرەكتورى ەلنۇر احمەتوۆ.
75 جاستاعى الماتىلىق ساۋلە اپا شاتقالعا نەمەرەلەرىن ەرتىپ كەلىپتى. ماقساتى وسى جاقۇت مەكەندى كورسەتۋ. وسى ۋاقىتقا دەيىن تالاي ەلدى ارالاپ كورىپ قايتقان زەينەتكەر مۇنداي كەرەمەت جەر ەش قايدا جوق دەيدى.
«جاپونيادا بولدىم. ۆارنا، بولگاريادا، تۇركيادا بولدىم. اتىراۋدا بولدىم. مىنانداي جەر ەش ءبىر مەملەكەتتە جوق. وسىنىڭ ءبارىن بالالارعا كورسەتۋ كەرەك. وقىتۋ كەرەك. بىزگە ساقتاۋ كەرەك. شارىن شاتقالىنداعى تاۋلارعا قاراپ وتىرىپ اق دەمالاسىڭ، سونداي ادەمى. مۇسىندەرى دە ەرەكشە» ، - دەيدى الماتى قالاسىنىڭ تۇرعىنى ساۋلە جانتۋاروۆا.
اۆتور: سامال قابىشەۆا