ەلوردا تۇرعىندارى التاي كولگىنوۆكە 90 عا جۋىق سۇراق قويدى

«ءبىر اپتانىڭ ىشىندە ازاماتتاردى ەكى مارتە قابىلدادىم. بۇل شامامەن 30 وتباسى، 90 عا جۋىق سۇراق ءتۇستى. سۇراقتاردىڭ دەنى باسپانا، مەديتسينالىق كومەك، جۇمىسپەن قامتۋ، تۇرعىن الاپتارىن دامىتۋ ماسەلەلەرىنە قاتىستى بولدى. بىزدە 16 تۇرعىن الابى بار. وندا قالانىڭ ءار ءتورتىنشى تۇرعىنى مەكەن ەتىپ جاتىر. بيىل وسى تۇرعىن الاپتاردا ءبىرقاتار اۋقىمدى جۇمىس اتقارىلدى: 100 دەن اسا كوشەگە اسفالت توسەلىپ، دەمالىس ورىندارىن قۇرۋ ءۇشىن 40 قوعامدىق كەڭىستىك پەن اۋلا اباتتاندىرىلدى (كوكتال-1, كوكتال-2، اگروقالاشىق، ينتەرناتسيونالنىي، ءوندىرىس جانە ت. ب. ). سونىمەن قاتار ميچۋرينودا كەڭ مەكتەپ اشىلدى. بۇرىن بۇل تۇرعىن الاپتا بىردە- ءبىر ءبىلىم وشاعى بولماعان ەدى. ەلدى مەكەندەردە ءالى دە مەكتەپ، مەديتسينالىق مەكەمە، دەنەشىنىقتىرۋ- ساۋىقتىرۋ كەشەندەرىن جانە تاعى باسقا نىسانداردى سالىپ جاتىرمىز»، - دەپ جازدى قالا اكىمى Instagram اككاۋنتىندا.

سونداي- اق ول 13,5 شاقىرىم ينجەنەرلىك جەلى، 5 شاقىرىمنان اسا كارىز بەن سۋ قۇبىرى، 3 شاقىرىمنان اسا نوسەر كارىزى سالىنعانىن اتاپ وتەدى.

«ينجەنەرلىك جەلىسىز وركەنيەتتىڭ بولمايتىنى بەلگىلى. سودان سوڭ جىلى ايالدامالاردى ورناتۋ جانە ونى جارىقتاندىرۋ، جاڭا اۆتوبۋس مارشرۋتتارىن ىسكە قوسۋ سياقتى ماسەلەلەر تاعى بار. پرەزيدەنتتىڭ تاپسىرماسى بويىنشا كەلەر 2021 -جىلى شەتكى ايماقتارعا ەرەكشە كوڭىل بولىنەدى. قازىر سونىڭ جوباسى ازىرلەنۋدە. ورىنباسارلارىما، اۋدان اكىمدەرىنە جانە باسقارما باسشىلارىنا جىل سوڭىنا دەيىن الدىن الا قابىلداۋعا جازىلعان ازاماتتاردىڭ كەزەگىن تەزىرەك جىلجىتۋدى تاپسىردىم»، - دەدى التاي كولگىنوۆ.