قاراعاندى وبلىسىندا اۋىز سۋعا قاتىستى 90 جوبا جۇزەگە اسىرىلادى
اۋىلدىق ەلدى مەكەندەردە 2023 -جىلعا قاراي ءجۇز پايىزدىق كورسەتكىشكە قول جەتكىزۋ كوزدەلىپ وتىر. بيىل بۇل مىندەتتى ورىنداۋ ءۇشىن وڭىردە 90 جوبا جۇزەگە اسىرىلادى. سۋمەن قامتاماسىز ەتۋدىڭ 25 جاڭا نىسانى سالىنىپ جاتىر، دەپ حابارلايدى قازاقپارات ءتىلشىسى.
ونلاين رەجيمدە وتكەن اپپاراتتىق كەڭەستە ساپالى اۋىز سۋمەن قامتاماسىز ەتۋ جاعدايى مەن الەۋەتى تالقىلاندى.
«پرەزيدەنتتىڭ قازاقستان حالقىنا جولداۋىن ورىنداۋ ماقساتىندا قاراعاندى وبلىسىندا 2019 -جىلى مەملەكەتتىك جانە ۇكىمەتتىك باعدارلامالار بويىنشا سۋمەن جابدىقتاۋ جانە سۋ بۇرۋ بويىنشا 31 جوبا ىسكە اسىرىلدى. ەلدى مەكەندەردە 295 شاقىرىم سۋ قۇبىرى جانە كارىز جەلىسى سالىندى جانە قايتا جاڭارتىلدى، سۋ قۇبىرى جەلىسىنىڭ توزۋى% 67- عا دەيىن، كارىز جەلىسىنىڭ توزۋى% 78 عا دەيىن تومەندەدى، 11 نىسان پايدالانۋعا بەرىلدى. 2020 -جىلى «وڭىرلەردى دامىتۋ» ، «نۇرلى جول» ، «جۇمىسپەن قامتۋدىڭ جول كارتاسى» باعدارلامالارى بويىنشا 90 جوبانى ىسكە اسىرۋعا قاراجات ءبولىندى. جىل قورىتىندىسى بويىنشا 380 شاقىرىمنان استام سۋ قۇبىرى مەن كارىز جەلىسىن سالۋ جانە قايتا جاڭارتۋ، 76,8 شاقىرىم جەلىگە اعىمداعى جوندەۋ جۇرگىزۋ جانە 25 نىساندى پايدالانۋعا بەرۋ جوسپارلانعان» ، - دەپ باياندادى ەنەرگەتيكا جانە تۇرعىن ءۇي- كوممۋنالدىق شارۋاشىلىق باسقارماسىنىڭ باسشىسى ۇلانتاي ۇسەنوۆ.
توعىز ايدا 274 شاقىرىم جەلى سالىندى جانە قايتا جاڭارتىلدى. ونىڭ ايتۋىنشا، وسى جىلعى جوبالاردى ىسكە اسىرۋ ساپالى سۋمەن قامتاماسىز ەتۋگە قولجەتىمدىلىكتى قالالاردا% 98 عا دەيىن، اۋىلدىق ەلدى مەكەندەردە %89,9 عا دەيىن جەتكىزۋگە مۇمكىندىك بەرەدى. الداعى ءۇش جىلعا جوسپارلار جاسالۋدا. رەسپۋبليكاعا تاعى 27 جوباعا ءوتىنىم بەرىلدى. «نۇرلى جەر» باعدارلاماسى بويىنشا 45 باسىم اۋىل ىرىكتەلىپ الىندى، ولاردىڭ التاۋىندا جۇمىستار باستالدى. 200 دەن از ادام تۇراتىن اۋىلداردا سۋدى بلوك- مودۋلدىك تازارتۋ كەشەندەرىن ورناتۋ جوسپارلانۋدا. ولاردى قۇراستىرۋ جانە پايدالانۋ وڭاي، قاجەت بولعان جاعدايدا جابدىقتى ءبىر جەردەن ەكىنشى جەرگە اۋىستىرۋدىڭ ەش قيىندىعى جوق. سونداي- اق، جاڭا ۇڭعىمالار سالۋ مۇمكىندىگى ءۇشىن جەراستى سۋلارىنا قوسىمشا بارلاۋ جۇرگىزىلەدى. وبلىستا ەسكىرگەن تازارتۋ قۇرىلىستارى ماسەلەسىن شەشۋگە كىرىستى.
بيىل ۇلىتاۋدا تازارتۋ قۇرىلىسىن، اباي مەن قاراباستا كارىز سورعى ستانسالارىن سالۋدى اياقتاۋ جوسپارلانىپ وتىر. قارقارالى اۋدانىنىڭ قاراعايلى كەنتىندە جانە اقتوعاي اۋىلىندا نىسانداردىڭ قۇرىلىسى كەزەكتە تۇر. وبلىس اكىمى جەڭىس قاسىمبەك الداعى بىرنەشە جىلدا وڭىردە ت ك ش جاڭعىرتۋ مەن دامىتۋدىڭ قازاقستاندىق ورتالىعىنىڭ كومەگىمەن 7 كارىز- تازارتۋ قۇرىلىستارىن سالۋ جوسپارلانعانىن حابارلادى.
«حالىقتى ساپالى اۋىز سۋمەن قامتاماسىز ەتۋ - جەرگىلىكتى بيلىك ورگاندارى جۇمىسىنىڭ ماڭىزدى باسىمدىقتارىنىڭ ءبىرى. سۋمەن جابدىقتاۋ نىساندارىن سالۋ جانە جوندەۋ بارىسىن قاتاڭ باقىلاۋ بولادى. سونىمەن قاتار، ەكولوگيالىق زاڭناما تالاپتارىن ساقتاۋ - تازارتۋ قوندىرعىلارىن قاراستىرۋ قاجەت»، - دەپ اتاپ ءوتتى ايماق باسشىسى.
جەڭىس قاسىمبەك جەزقازعان وڭىرىندە ەسقۇلا سۋ تارتقىشىن سالۋ جانە بالقاشتاعى توقىراۋ - ساياق سۋ تارتقىشىن رەكونسترۋكتسيالاۋ بويىنشا جوبالاردىڭ ىسكە اسىرىلۋى ەرەكشە باقىلاۋدا ەكەنىن ەسكە سالدى.