كوروناۆيرۋس: اۋرۋحانالارعا جۇكتەمە %90 اسسا، كارانتين قايتا كۇشەيتىلەدى
بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترىنىڭ مىندەتىن اتقارۋشى ءلاززات اقتايەۆا ايتتى، دەپ حابارلايدى قازاقپارات ءتىلشىسى.
«وسى اپتانىڭ 3 كۇنىندە جاعداي قولايسىز بولىپ سيپاتتالادى. وسى اپتانىڭ 3 كۇنىن وتكەن اپتانىڭ وسىنداي كەزەڭىمەن سالىستىرعاندا ءوسىم 1,6 ەسە بولىپ وتىر. بۇل رەتتە، 15 وڭىردە اۋرۋدىڭ 1,2 ەسەدەن 6 ەسەگە دەيىن وسكەنى بايقالادى»، - دەدى ل. اقتايەۆا.
ونىڭ اتاپ وتۋىنشە، جاعدايدى وبەكتيۆتى باعالاۋ ماقساتىندا دەنساۋلىق ساقتاۋ مينيسترلىگى ەپيدەميولوگيالىق احۋالدى باعالاۋدىڭ قوسىمشا ولشەمشارتتارىن ەنگىزدى.
«بىرىنشىدەن، ەپيدەميولوگيالىق جاعدايدىڭ ديناميكاسى نازارعا الىنادى. بۇل جەردە ءبىز بۇرىن پايدالانىلعان «ءوسۋ قارقىنى» دەگەن كورسەتكىشتەن ارىلامىز. سەبەبى جالپى اۋرۋ جاعدايلارىنىڭ سانى بەلسەندى اۋىراتىن ناۋقاستاردىڭ سانىنان وزگەشە بولعان جاعدايدا، بۇل كورسەتكىش ەپيدەميانىڭ دامۋ قارقىنىن تولىق كولەمدە كورسەتپەيدى. ءبىز جاعدايدى باعالاۋ ءۇشىن R - رەپرودۋكتيۆتى سان كورسەتكىشىن قولدانامىز. ياعني كوروناۆيرۋس ينفەكتسياسىنا شالدىققان 1 ناۋقاس ورتاشا ەسەپپەن اۋرۋ جۇقتىراتىن بايلانىستا بولعان ادامداردىڭ سانى»، - دەدى مينيستر مىندەتىن اتقارۋشى.
ەكىنشىدەن، ونىڭ ايتۋىنشا، شەكتەۋ شارالارى مىندەتتەرىنىڭ ءبىرى ناۋقاستار اعىنىنا شاماسى كەلمەيتىن كەزدە دەنساۋلىق ساقتاۋ جۇيەسىنىڭ شامادان تىس جۇكتەلۋىنە جول بەرمەۋ بولىپ تابىلادى. سوندىقتان ەكىنشى ولشەمشارت كوروناۆيرۋس ينفەكتسياسىمەن اۋىراتىن ناۋقاستارعا ارنالعان بوس ەمەس توسەك قورىنىڭ كورسەتكىشى سانالادى.
«سونداي-اق، ءبىز قوسىمشا كورسەتكىشتەردى دە ەسكەرەمىز. بۇل - ك ۆ ي- دەن بولاتىن ءولىم-ءجىتىم كورسەتكىشىنىڭ ءوسۋى، اۋىر جانە وتە اۋىر دارەجەدەگى ناۋقاستاردىڭ ۇلەسى. ەگەر R كورسەتكىشى 1,3 تەن اساتىن بولسا نە ول 1,15 تەن 1,3 كە دەيىنگى دياپازوندا بولسا، بۇل رەتتە بوس ەمەس توسەكتەر 70 پايىزدان ارتىق بولسا نە بوس ەمەس توسەكتەردىڭ پايىزى رەپرودۋكتيۆتىك سانعا قاراماستان 90 پايىزدان جوعارى بولسا، كارانتيندىك جانە شەكتەۋ شارالارىن كۇشەيتۋ قاجەت»، - دەدى ول.
ءلاززات اقتايەۆانىڭ ايتۋىنشا، باتىس قازاقستان، قوستاناي جانە ماڭعىستاۋ وبلىستارى شەكتەۋ شارالارىن بۇرىنعى كولەمدە قالدىرىلۋى مۇمكىن. بۇگىنگى كۇنى قوسىمشا قاتاڭداتۋ شارالارى بارلىق 16 وڭىردە ەنگىزىلدى.