الماتىدا بيبىگۇل تولەگەنوۆانىڭ 90 جىلدىق مەرەيتويى اتاپ ءوتىلدى
اباي اتىنداعى مەملەكەتتىك اكادەميالىق وپەرا جانە بالەت تەاترىنا بيبىگۇل تولەگەنوۆانىڭ تۋىستارى، ساياسي جانە قوعام قايراتكەرلەرى، سونداي-اق مادەنيەت پەن ونەر وكىلدەرى جينالدى.
قازاقتىڭ بۇلبۇلى اتانعان بيبىگۇل تولەگەنوۆانى الماتى قالاسىنىڭ اكىمى باقىتجان ساعىنتايەۆ قۇتىقتادى.
«بۇگىن — بارشامىز ءۇشىن ەرەكشە كۇن. سەبەبى ءومىرى ونەرگە، ونەرى ومىرگە اينالعان اياۋلى بيبىگۇل اپايىمىز قۋانىشىن بىزبەن ءبولىسىپ وتىر. قازاقتىڭ كاسىبي ءان ونەرى دەگەندە ءبىزدىڭ ويىمىزعا بىردەن كۇلاش بايسەيتوۆا، روزا باعلانوۆا، ەرمەك سەركەبايەۆ جانە بۇگىنگى توي يەسى بيبىگۇل تولەگەنوۆا ورالادى. تابيعي تالانتى مەن تىنىمسىز ەڭبەگىنىڭ ارقاسىندا ونەردىڭ شىڭىنا شىققان، حالقىنىڭ شىنايى ماحابباتىنا بولەنگەن بيبىگۇل اپامىزدى وسىدان 10 جىل بۇرىن پاۆلودار وبلىسىنىڭ اكىمى بولىپ وتىرعان كەزىمدە قۇتتىقتاپ، باتاسىن الىپ ەدىم. بۇگىن ارۋ الماتىنىڭ سول كىسىگە دەگەن ىستىق ىقىلاسىن جەتكىزۋ باقىتى تاعى دا ماعان بۇيىرىپ وتىر. مەن ءۇشىن بۇل ەرەكشە قۋانىشتى ءسات. بۇگىنگى توي تۇتاستاي قازاق ونەرىنىڭ مەرەكەسى. توي بارشاڭىزعا قۇتتى بولسىن!» - دەدى باقىتجان ساعىنتايەۆ.
بيبىگۇل تولەگەنوۆانىڭ 90 جىلدىعىنا ارنالعان شىعارماشىلىق كەشكە ق ر مادەنيەت جانە سپورت ءمينيسترى اقتوتى رايىمقۇلوۆا دا قاتىسىپ، جۇرەكجاردى قۇتتىقتاۋىن جەتكىزدى.
«وسىدان تۋرا 19 كۇن بۇرىن ەلىمىزدىڭ ورداسى، نۇر-سۇلتان قالاسىندا تاماشا كەش بەردىڭىز. مادەنيەت جانە سپورت مينيسترلىگى ۇيىمداستىرعان «استانا وپەرا» تەاترىندا وتكەن مەرەكەلىك شارادا قازاقستاندىق تانىمال وپەرا انشىلەرى، ءىزباسارلارىڭىز، بيبىگۇل تولەگەنوۆا بايقاۋىنىڭ لاۋرەاتتارى ءان شىرقاپ، مەرەيىڭىزدى تاسىتتى. ءاردايىم وسىلاي ابىروي بيىگىندە بولىڭىز، ءسىز اسقار شىڭعا شىعۋدىڭ، شىققان سوڭ سول بيىكتە ماڭگىلىككە قالۋدىڭ وزىق ۇلگىسىن كورسەتكەن ءبىرتۋار تالانت يەسىسىز! ءسىز تاعدىر تالايىڭىزدا سان ءتۇرلى قيىندىقتى كورگەن، قانداي ساتسىزدىكتى بولسىن پاراساتتىلىقپەن، اقىلمەن ەڭسەرە بىلگەن كەمەڭگەر اڭىز ادامسىز. ەندى سول بەينەتىڭىزدىڭ زەينەتىن كورىپ، ورتامىزدا ءجون سىلتەر، باعدار بەرەر اقىلمانىمىز بولىپ امان ءجۇرىڭىز»، - دەدى اقتوتى رايىمقۇلوۆا.
