قازاقستاندا تراكتور ءوندىرىسى ءۇش ەسەگە وسسە دە، قاجەتتىلىكتىڭ 90 پايىزىن يمپورت جاۋىپ وتىر
«وسى جىلدىڭ قاڭتار- ءساۋىر ايلارىندا اۋىل جانە ورمان شارۋاشىلىعىنا قاجەتتى تراكتور ءوندىرىسى 3,3 پايىزعا ءوسىپ، 215 داناعا جەتكەن. سالىستىرا كەتەيىك: ءبىر جىل ەلدە تەك 65 دانا تراكتور وندىرىلگەن ەدى. بۇل كورسەتكىش 2017 -جىلدىڭ كورسەتكىشىنە قاراعاندا 52 پايىزعا از»، - دەلىنگەن حابارلامادا.
اۋىل شارۋاشىلىعىنا قولدانىلاتىن تراكتوردىڭ كوبى شىعىس قازاقستان وبلىسىندا شىعارىلىپ جاتىر. سەمەيدەگى «سەماز» ج ش س زاۋىتى ەلدەگى تراكتورلاردىڭ تورتتەن ءۇش بولىگىن وندىرۋدە. ال قالعان 25 پايىزى قوستاناي وبلىسىنداعى «اگرو ماش حولدينگ ك ز» ا ق- نا تيەسىلى.
«اگرو ماش حولدينگ ك ز» ا ق - قازىرگى ۋاقىتتا ESSIL ماركالى استىق جينايتىن كومبايندى جانە كەڭ اسسورتيمەنتتە قوسالقى بولشەكتەردى شىعاراتىن قازاقستانداعى بىردەن- ءبىر وندىرىستىك كاسىپورىن ەكەنىن اتاپ ءوتۋ كەرەك. سونداي- اق، كومپانيا «گومسەلماش» كومپانياسىنىڭ قازاقستان اۋماعىنداعى بىردەن- ءبىر ديستريبيۋتورى سانالادى.
«اگرو ماش حولدينگ ك ز» ا ق وسى جىلدىڭ مامىر ايىندا Lovol كومپانياسىنداعى قىتايلىق ارىپتەستەرىمەن قوستانايدا تراكتور ءوندىرۋ بويىنشا سەح اشتى. «اگرو ماش حولدينگ ك ز» ا ق ديرەكتورىنىڭ ءبىرىنشى ورىنباسارى دينارا شۇكەجانوۆا ءمالىم ەتكەندەي، جوبانىڭ قۇنى - 1,6 ميلليارد تەڭگە. جىلىنا مۇندا 3 مىڭ تراكتور شىعارۋ جوسپارلانعان.
«تراكتوردىڭ باعاسى بۇل جەردە 2,5-14 ميلليون تەڭگە ارالىعىندا بولادى. ءبىز وندىرىستىك قۇراۋ جۇمىسى بويىنشا كەلىسىمگە كەلدىك. ول جۇمىس اياسىندا جىل سايىن بەلگىلى ءبىر شەكتەۋ دەڭگەيىنە جەتە ءبىلۋىمىز كەرەك. ءوندىرىس 5-6 جىل بويى ىسكە قوسىلىپ تۇرسا، زاۋىتتا كابينالار قۇراستىرىلىپ، تولىق بوياۋ، دانەكەرلەۋ جۇمىسى رەتكە كەلتىرىلەدى. بۇگىنگە دەيىن 100 تراكتور ءوندىرىلىپ، ونىڭ 60-ى «قاز اگرو قارجى» ارقىلى ساتىلىپ كەتتى. كەلەسى جىلى رەسەيگە، تاجىكستان مەن وزبەكستانعا تراكتورلاردى ەكسپورتتاۋدى كوزدەپ وتىرمىز»، - دەيدى ديناشا شۇكەجانوۆا.
ەسكە سالا كەتسەك، وتكەن جىلدىڭ العاشقى توقسانىنىڭ قورىتىندىسى بويىنشا ەلىمىزدە 1440 تراكتور ساتىلىپ، تورتەۋى عانا ەكسپورتقا شىعارىلعان بولاتىن. ءوندىرىس مولشەرى ءۇش ەسەگە ارتقانىمەن، نەگىزگى ۇلەس، ياعني 90,6 پايىز - ءبارىبىر يمپورتتىق تەحنيكالاردا قالىپ وتىر.
فوتو: finance.tut.by
اۆتور: ايان بەكەن ۇلى