قازاقستاندا وندىرىلگەن اليۋمينيدىڭ 90 پايىزى ەكسپورتتالادى
زاۋىت جىلىنا قانشا كولەمدە ءونىم شىعارادى؟ ونەركاسىپ قانشا وتانداستارىمىزدى جۇمىسپەن قامتاماسىز ەتىپ وتىر؟ وسى جانە باسقا دا سۇراقتارعا جاۋاپتى قازاقپارات ءتىلشىسى زاۋىت جۇمىسىمەن تانىسۋ بارىسىندا ءبىلىپ قايتتى.
پاۆلودارداعى ەلەكتروليز زاۋىتى ون جىل بويى حالىقارالىق ستاندارتتارعا سايكەس كەلەتىن وتاندىق اليۋميني وندىرۋدە. قازاقستان ەلەكتروليز زاۋىتىندا وندىرىلگەن باستاپقى اليۋميني رەسمي تۇردە لوندون مەتالل بيرجاسىندا تىركەلگەن، ول ءوز كەزەگىندە شىعارىلاتىن ءونىمنىڭ ساپاسىن دالەلدەيدى. ونەركاسىپ قۇرىلىسى 2005 -جىلى باستالىپ، 2007 -جىلدىڭ قىركۇيەگىندە ەلباسىنىڭ قاتىسۋىمەن لەنتاسى قيىلىپ، زاۋىت وتاندىق العاشقى اليۋمينيدى شىعاردى. 2007 -جىلدىڭ اياعىندا قازاقستان ەلەكتروليز زاۋىتى 11 مىڭ توننا اليۋميني جاساپ شىعارسا، 2010 -جىلدىڭ ماۋسىم ايىندا مەملەكەت باسشىسى نۇرسۇلتان نازاربايەۆ ەكىنشى كەزەكتى ىسكە قوستى جانە بۇگىندە كاسىپورىن جىلىنا 258 مىڭ توننا اليۋميني وندىرەدى.
«اليۋميني وندىرۋدە الدىمەن گلينوزەم كەرەك، ول ءوزىمىزدىڭ پاۆلوداردا بار. ال ەلەكتر توعىمەن ءبىزدى اقسۋ زاۋىتى قامتاماسىز ەتەدى. ءۇشىنشى قاجەتتىلىك - كومىرتەگى انودى. ونى باسىندا سىرتتان الاتىنبىز. 2014 -جىلى قازاقستاننىڭ دامۋ بانكىنىڭ قارجىلاندىرۋىمەن وزىمىزدە وندىرەتىن بولدىق. دەمەك اليۋميني شىعارۋداعى شيكىزاتتىڭ % 90- ى وزىمىزدە بار. زاۋىت 2500-گە جۋىق ادامدى جۇمىسپەن قامتاماسىز ەتىپ وتىر، ونىڭ دەنى جاستار»، - دەدى «قازاقستان ەلەكتروليز زاۋىتى» ا ق- نىڭ ءوندىرىس بويىنشا ۆيتسە- پرەزيدەنتى باۋىرجان سمايلوۆ باسپا ءسوز تۋرى بارىسىندا.
ونىڭ ايتۋىنشا، زاۋىت اشىلعان جىلدارى باستى ماماندار شەتەلدىكتەردەن تۇرسا، بۇگىندە تولىعىمەن وتاندىق ماماندار جۇمىس ىستەيدى.
«بيىلعى جىلدىڭ 9 ايىنداعى ەسەپ بويىنشا 181 مىڭ توننادان اسا دايىن ءونىم ەكسپورتتالدى، وتكەن جىلى وسى ۋاقىت ارالىعىندا 163 مىڭ توننا ءونىم سىرتقا جىبەرىلگەن. جالپى بىزدەگى اليۋمينيي ءوندىرىسىنىڭ % 90- ى ەكسپورتتالادى، ونىڭ % 70- ى ورتالىق جانە شىعىس ەۋروپا ەلدەرىنە، % 20- ى رەسەيگە، ال قالعان 10 پايىزى ءوزىمىزدىڭ ىشكى نارىقتى قامتاماسىز ەتەدى. تاعى ءبىر ايتىپ كەتەتىن دۇنيە بىزدە قورشاعان ورتانىڭ تازالىعى قاتاڭ ساقتالادى، پايىزدىق ەسەپپەن الساق 99,4 پايىز زياندى قالدىقتارسىز شىعارامىز»، - دەدى ول.
زاۋىتتىڭ نەگىزگى ءونىمى ا8 جانە ا85 ماركالى 20 كەلىلىك اليۋميني قۇيمالارى، سونداي- اق، كاسىپورىننىڭ ەرتىس وڭىرىندە ىسكە قوسىلۋى بۇگىنگى تاڭدا كەن ءوندىرۋ مەن گلينوزەمدى شىعارۋدان مەتالل الۋىنا دەيىنگى تولىق وندىرىستىك كەزەڭدى قامتىپ وتىر.
سونىمەن قاتار، كاسىپورىن وبلىس اكىمدىگىمەن بىرلەسكەن مەموراندۋم اياسىندا ءبىرقاتار الەۋمەتتىك جوبالاردى جۇزەگە اسىرادى، اتاپ ايتقاندا زاۋىتتىڭ قارجىلاي قولداۋىمەن پاۆلوداردا ساياباق پەن بالالارعا ارنالعان الاڭدار سالىنىپ، قالا تۇرعىندارىنىڭ يگىلىگىنە بەرىلدى.
بۇعان دەيىن پاۆلودار وبلىسىنىڭ اكىمى بولات باقاۋوۆ وڭىردە ورتاشا ايلىق ەڭبەكاقى 8,2 پايىزعا ءوسىپ، 137 مىڭ تەڭگەنى قۇراعانىن ءمالىم ەتكەن بولاتىن.
ودان بولەك، ۇستىمىزدەگى جىلدىڭ باسىندا اتالعان زاۋىت العاش رەت سۇيىق اليۋمينيدى قۇيىپ جونەلتۋدى ءساتتى جۇزەگە اسىردى. «Giessenhaus» ج ش س- نا جولدانعان سۇيىق كۇيدەگى مەتاللدىڭ ءبىرىنشى لەگى شامامەن بەس توننانى قۇرادى.
اۆتور: داۋلەت ىزتىلەۋ