قاراعاندىدا العاشقى قازاقستاندىق مىستىڭ بالقىتىلۋىنىڭ 90 جىلدىعى اتالىپ ءوتتى
بۇل وقيعا العاش رەت 1928- جىلدىڭ 19- قازانىندا بولعان ەدى، دەپ حابارلايدى قازاقپارات ءتىلشىسى ءوڭىر اكىمدىگىنىڭ باسپا ءسوز قىزمەتىنە سىلتەمە جاساپ.
مەتاللۋرگتەردى قاراعاندى وبلىسىنىڭ اكىمى قۇتتىقتادى. ءوزىنىڭ قۇتتىقتاۋ سوزىندە ەرلان قوشانوۆ قارساقپاي زاۋىتىنىڭ ماڭىزدىلىعىن اتاپ ءوتتى.
«وسىدان 90 جىل بۇرىن قارساقپايدا اتاۋلى وقيعا - قازاقستانداعى ءبىرىنشى مىس بالقىتىلدى. تاريح ءۇشىن قاس- قاعىم عانا ءسات، دەگەنمەن وسى ۋاقىت ارالىعىندا كوپتەگەن وقيعالار بولدى. قانىش ساتپايەۆتىڭ عىلىمي قىزمەتى دە وسى جەردەن باستاۋ العان، مۇندا ءبىزدىڭ ەلىمىزدىڭ العاشقى مەتاللۋرگتەرى ەڭبەك ەتكەن. سوندىقتان تەك ايماعىمىز ءۇشىن عانا ەمەس، جالپى ەلىمىز ءۇشىن زاۋىت جۇمىسىن جالعاستىرعانى ماڭىزدى، سەبەبى ول تاريح، ءبىزدىڭ مەتاللۋرگيامىزدىڭ باستاۋى»، - دەدى وبلىس باسشىسى.
قارساقپايداعى مىس بالقىتۋ زاۋىتى قازاقستانداعى ءبىرىنشى نىسان بولدى. مۇندا حيميالىق قۇرامى ەرەكشە بولىپ كەلەتىن جەزقازعاندىق مىس رۋداسىن وڭدەۋدىڭ جاڭا تەحنولوگيالارى يگەرىلگەن. سوڭىندا ول تەحنولوگيا ورالداعى جانە بالقاشتاعى زاۋىتتاردى جوبالاۋ كەزىندە پايدالانىلعان.
قارساقپاي تەك ساپالى مىسپەن عانا ەمەس، سونىمەن قاتار بىلىكتى ماماندارى، قىزمەتكەرلەرىمەن دە وتە تانىمال بولعان. مۇندا وزدەرىنىڭ ەڭبەك جولىن تەك قازاقستاننىڭ عانا ەمەس، بۇكىل كەڭەس وداعىنىڭ اتاقتى مەتاللۋرگتەرى باستاعان.
«1954- جىلى مەنى جاس مامان رەتىندە قارساقپاي مىس بالقىتۋ زاۋىتىنا باعىتتادى. مەن مۇندا 50 جىل جۇمىس ىستەدىم. مەن وسىندا ەندى عانا جۇمىس ىستەي باستاعاندا زاۋىتتىڭ ونىمدىلىگى جىلىنا بەس مىڭ توننانى قۇراعان بولاتىن. ال مەن زەينەتكەرلىككە كەتەردە ول كورسەتكىشتەر بىرنەشە ەسە وسكەن. ءبىز وسىنداي تاريحي كاسىپورىندى دامىتۋعا ۇلەسىمىزدى قوسقانىمىزدى ماقتان تۇتامىز»، - دەدى ارداگەر- مەتاللۋرگ نىعمەت ءىلياسوۆ.
بۇگىنگى تاڭدا زاۋىتتىڭ نەگىزگى قىزمەت ءتۇرى «Kazakhmys Holding» ج ش س كاسىپورىندارى ءۇشىن شويىن زاتتاردى دايىنداۋ بولىپ تابىلادى. زاۋىت كومپانيانىڭ كەنىشتەرى، فابريكالار مەن زاۋىتتارى پايدالاناتىن قۇرىلعىلاردىڭ قوسالقى بولشەكتەرى سەكىلدى شامامەن 80-گە جۋىق ونىمدەردى جاساپ شىعارادى.
ايماق باسشىسى جانە مەرەكە قوناقتارى قايتا قالىپقا كەلتىرىلگەن قانىش ساتپايەۆتىڭ مۇراجاي ۇيىندە بولىپ قايتتى. بۇل ۇيدە عالىم تەك وتباسىمەن تۇرىپ قانا قويماي، قازاقستانداعى العاشقى گەولوگيالىق- بارلاۋ كونتوراسىن اشقان. ول جايلى ەستەلىك تاقتادا ايتىلعان. بۇل عيمارات 1969- جىلدان باستاپ كەلۋشىلەر ءۇشىن ەسىگىن ايقارا اشتى. قازىرگى كۇنى مۇراجاي- ۇيدە 3 مىڭعا جۋىق جادىگەرلەر بار.
سالتاناتتى شارا بارىسىندا ۇزدىك مەتاللۋرگتەر مەن ارداگەرلەرگە قاراعاندى وبلىسى اكىمىنىڭ العىس حاتتارى تابىس ەتىلدى. «قازاق مىس» كورپوراتسياسى ولارعا اۆتوكولىكتەردىڭ كىلتىن سىيلادى. مەرەكەلىك توي- دۋمان سپورتتىق سايىستارعا جانە كونسەرتتىك باعدارلاماعا ۇلاستى.
اۋدارما: مارلان جيەمباي
