پروكۋرور اكتەر ەرلان ءبىلالعا 90 ميلليون تەڭگە ايىپپۇل سالۋدى سۇرادى
مەملەكەتتىك ايىپتاۋشى ەرلان ءبىلالدان العان پاراسىنان 60 ەسە كوپ ايىپپۇل، ياعني 90 ميلليون تەڭگە ءوندىرىپ الۋدى سۇرادى. پروكۋرور سونىمەن قاتار، ونى بارلىق مەملەكەتتىك ماراپاتتارىنان ايىرۋ قاجەتتىگىن جەتكىزدى.
ەرلان ءبىلالدىڭ قورعاۋشىلارى قىلمىستىق كودەكستىڭ 65-بابىنا سىلتەمە جاساي وتىرىپ (كىناسىنە وكىنۋ - رەد)، ايىپتالۋشىنى قىلمىستىق جاۋاپكەرشىلىكتەن بوساتۋدى نەمەسە پروكۋرور سۇراعان ايىپپۇل كولەمىن ازايتۋدى سۇرادى. ادۆوكاتتار قورعاۋىنداعى ادامنىڭ 4 بالاسى، ونىڭ ەكەۋى كامەلەت جاسقا تولماعانىن، اسىراۋىندا نەمەرەسى بار ەكەنىن العا تارتتى.
ەرلان ءبىلالدىڭ ءوزى سوتقا ۇكىم شىعاراردا ونىڭ دەنساۋلىعىنىڭ ناشارلىعىن جانە كىناسىن تولىق مويىنداعانىن ەسكەرۋدى، مۇمكىن بولسا، باس بوستاندىعىنان ايىرماي، ايىپپۇل كولەمىن ازايتۋدى سۇرادى.
«سەزام» قوعامدىق قايىرىمدىلىق قورىنىڭ پرەزيدەنتى قايرات بايانوۆتىڭ ادۆوكاتى قورعاۋىنداعى ازاماتتىڭ ماتەريالدىق شىعىنعا قاتىستى ەشقانداي شاعىمى جوق ەكەنىن، ويتكەنى بارلىق قاراجات وتەلگەنىن جەتكىزدى. دەگەنمەن، قايرات بايانوۆ كەلتىرىلگەن مورالدىق زالال ءۇشىن 1 ميلليون تەڭگە تالاپ ەتەتىنىن جەتكىزدى، ءبىراق وعان ەرلان ءبىلالدى قورعاۋشى تاراپ قارسى شىقتى. بۇل ماسەلەگە قاتىستىڭ سوتتىڭ ۇستانىمى ۇكىم شىققاندا بەلگىلى بولماق.
ايتا كەتەيىك، تەرگەۋشىلەردىڭ مالىمەتى بويىنشا، ەرلان ءبىلال «سەزام» تەاترىنىڭ جەتەكشىسى قايرات بىلالدەن 1,5 ميلليون تەڭگە پارا تالاپ ەتكەن. ول 2018 -جىلدىڭ 2 -قاڭتارىندا 600 مىڭ تەڭگە العان، 4 -قاڭتاردا پارانىڭ قالعان بولىگىن 900 مىڭ تەڭگەنى الىپ جاتقانىندا قولعا ءتۇستى.
