استانادا 90 جىلدان بەرى تۇركى الەمىندە بولماعان جيىن باستالدى - فوتو
حالىقارالىق تۇركى اكادەمياسىنىڭ پرەزيدەنتى دارحان قىدىرالىنىڭ ايتۋىنشا، 1926 -جىلى باكۋدە وتكەن ءبىرىنشى تۇركولوگيالىق كونگرەستەن بەرى تۇركى الەمىندە وسىنداي جيىن وتكەن جوق.
«بۇگىن تۇركى اكادەمياسىنىڭ ۇيىمداستىرعان فورۋمدا تۇركولوگيا ماسەلەلەرىن، تۇركى تاريحى مەن ادەبيەتىن، جالپى، 21 - عاسىرداعى گۋمانيتارلىق عىلىمداردىڭ دامۋى جونىندە اڭگىمە قوزعايمىز. بۇگىن ءبىزدىڭ جيىنىمىزعا جيىرمادان استام ەلدەن 200-دەن استام عالىمى كەلىپ وتىر. ونىڭ ىشىندە حالىقارالىق ۇيىمداردىڭ باسشىلارى، حالىقارالىق اكادەميالاردىڭ باسشىلارى، سونىمەن قاتار، حالىقارالىق ساراپشىلار بار. جالپى، ءتورت پانەلدەن تۇراتىن بۇگىنگى فورۋمدى ءبىز قوجا احمەت ياسساۋيدىڭ 800 جىلدىعىنا، ءجۇسىپ بالاسۇعىننىڭ مىڭ جىلدىعىنا جانە باكۋ كونگرەسىنىڭ 90 جىلدىعىنا، سونىمەن قاتار، تاۋەلسىزدىگىمىزدىڭ 25 جىلدىعىنا ارناپ وتىرمىز»، - دەدى د. قىدىرالى فورۋمعا كەلگەن جۋرناليستەرمەن اڭگىمەلەسە وتىرىپ.
جالپى، گۋمانيتارلىق عىلىمداردىڭ بۇل فورۋمىنا قر مەملەكەتتىك حاتشىسى گۇلشارا ءابدىقالىقوۆا، ق ر پرەزيدەنتى كەڭسەسىنىىڭ باسشىسى، فورۋم ءوتىپ جاتقان نازاربايەۆ ورتالىعىنىڭ ديرەكتورى ماحمۇد قاسىمبەكوۆ، يسلام ىنتىماقتاستىعى ۇيىمىنىڭ جانىنداعى IRCICA ۇيىمىنىڭ باس ديرەكتورى حاليت ەرەن، يۋنەسكو ىستەرى جونىندەگى تۇركيا ۇلتتىق كوميسسياسىنىڭ ءتوراعاسى م. ءوجال وعىز، اتاتۇرىك اتىنداعى مادەنيەت، ءتىل جانە تاريح جونىندەگى جوعارى قۇرىلىم باسشىسى ءداريا ءورس قاتىسىپ جاتىر. مەملەكەتتىك حاتشى گۇلشارا ءابدىقالىقوۆا ق ر پرەزيدەنتى نۇرسۇلتان نازاربايەۆتىڭ فورۋمعا جولداعان لەبىز حاتىن جەتكىزدى.
فورۋم ناقتى قاي ماسەلەلەردى تالقىلايدى دەگەنگە كەلسەك، تۇركى اكادەمياسىنىڭ پرەزيدەنتى دارحان قىدىرالىنىڭ ايتۋىنشا، كۇن تارتىبىندە تۇركى ءتىلى مەن ادەبيەتى سالاسىنداعى ماسەلەلەر قارالادى.
«تۇركولوگيا عىلىمىنىڭ ماماندارى وسىدان 90 جىل بۇرىن باكۋدە باس قوسىپ، تۇركىتانۋ عىلىمدارىنىڭ زاڭدىلىقتارى بويىنشا، تۇركى ادەبيەتى، تۇركى ءتىلى، تۇركى تاريحى بويىنشا وتە ماڭىزدى شەشىمدەر قابىلداعان بولاتىن. سودان بەرى تۇركى الەمىندە وسىنداي جيىن وتكەن جوق. بۇگىن ءبىز 90 جىل بۇرىنعى تۇركى الەمىنىڭ ۇلى عالىمدارىنىڭ باس قوسۋىندا قابىلدانعان شەشىمدەردىڭ جالعاسى تۋرالى، ياعني، ءداستۇر ساباقتاستىعى تۋرالى اڭگىمەلەسەمىز»، - دەدى د. قىدىرالى.
