قازاق كينو ونەرىنىڭ 90-جىلدارداعى جۇلدىزدى اكتەرلەرى كىمدەر؟
وتكەن عاسىردىڭ 80-جىلدارىنىڭ سوڭىندا تۇسىرىلگەن فيلمدەر مونتاجدالىپ، ەفيرگە جول تارتىپ جاتتى. ءبىزدىڭ ايتپاعىمىز 90-جىلدارى جارق ەتە قالعان قازاق كينوسىنداعى جارىق جۇلدىزدار كىم ەدى؟
ەربولات وسپانقۇلوۆ
رەجيسسەر تالعات تەمەنوۆتىڭ «ادامدار اراسىنداعى بولتىرىك»، «ماحاببات بەكەتى» سىندى فيلمدەرىندە ويناعان ەربولات وسپانقۇلوۆ كورەرمەننىڭ جادىندا «گىلى-گىلى» بولىپ قالدى. ءوزى دە ءبىر سۇحباتىندا «قايدا بارسام دا مەنى «گىلى-گىلى» دەپ اتايتىن. باسىندا قاتتى اشۋلاندىم. ءتىپتى ايتقان ادامدى ۇرىپ جىبەرۋگە دەيىن باراتىنمىن» - دەپ ەسكە الادى اكتەر.
ءتىسى جوق، مىلقاۋ بالانىڭ كەيپىنەن كەيىن «ماحاببات بەكەتىندەگى» ورالدىڭ پويىزداعى ساپارلاس سەرىگىن وينادى. ەربولات وسپانقۇلوۆ وسىلايشا كورەرمەننىڭ كوڭىلىنەن بىردەن ورىن تاپتى دەي الامىز.
قانىمبەك قاسىمبەكوۆ
«شاڭىراق»، «جانسەبىل»، «اينالايىن» فيلمدەرىنىڭ ءىزىن الا رەجيسسەر قانىمبەك قاسىمبەكوۆتىڭ «قوشتاسقىم كەلمەيدى» كارتيناسى جارىق كوردى.
ارادا 25 جىلداي ۋاقىت وتسە دە ءوز كورەرمەنىن جوعالتپاعان فيلم. كومپوزيتور مارات وماروۆ جازعان اۋەننىڭ ءجونى بولەك. انگە قوسىلىپ، ەلىتىپ كەتەسىز. ايگەرىمنىڭ ءرولىن ءنازيرا باقايەۆا سومدادى. نۇرسەيىتتىڭ ءرولىن سومداعان مەيرامبەك بەسبايەۆتىڭ جۇلدىزىن جاققان رەجيسسەر كانو ەكەنىن بىلەمىز. كانو دەپ ونى ارىپتەستەرى، دوستارى سولاي اتايتىن. «قوشتاسقىم كەلمەيدى» ءانىن بوزبالا مەيرامبەك تە جەتەرىنە جەتكىزە ورىندادى. ال رەجيسسەر عاشىقتىڭ ءتىلى - ءتىلسىز ءتىل دەگەندى وسى كينودا انىق ۇقتىرعانداي بولدى.
«ماحاببات بەكەتى» 1993-جىل. رەجيسسەرى تالعات تەمەنوۆ
بۇگىنگى شوۋ بيزنەستىڭ حانشايىمىنا بالانعان بايان ەسەنتايەۆانىڭ كينوداعى العاشقى قادامى وسى «ماحاببات بەكەتى» كينوكارتيناسىنان باستالدى دەسەك بولادى. ورال ءرولىن قۋانىشبەك ءادىلوۆ، جەڭىستى سومداعان بوپەش جاندايەۆ جانە گۇلناز بەينەسىن بايان مۇحيتدەنوۆا (ەسەنتايەۆا) ءوز دەڭگەيىندە الىپ شىقتى. 20 جىلدان بەرى قازاق تەليەۆيزياسىنىڭ ەكرانىنان تۇسپەي كەلە جاتقانى سونىڭ ايعاعى.
وسىلايشا بويجەتكەن باياننىڭ كينەماتوگرافيا جولىنداعى ءىزاشار فيلمى ونىڭ ونەر جولىن تاڭداۋىنا سەپ بولدى. دەگەنمەن بايان ماقسات قىزى وسى كارتينادان كەيىن اراعا 17 جىل سالىپ قانا كينوعا ورالدى. 2010-جىلى تۇسىرىلگەن «استانا ماحابباتىم مەنىڭ» فيلمىندە لاۋرانىڭ ءرولىن سومدادى.
«كىمنىڭ جانى نازىك بولسا» اباي قارپىقوۆ 1996-جىل
كورەرمەنگە ورىس تىلىندە تۇسىرىلگەن «توت، كتو نەجنەە» كينوكارتيناسىنداعى باندى ءرولى ارقىلى تانىلعان فارحاد ءابدىرايىموۆتى دە 90-جىلداردىڭ جارىق جۇلدىزى دەۋگە بولادى. كينوداعى العاشقى باسپالداعى ارقىلى كورەرمەننىڭ ەسىندە قالعان وبرازى ونى باسقا دا فيلمدەرگە تۇسۋىنە سەبەپكەر ەتتى. ارتىنشا فارا سىندى وزىندىك قولتاڭباسى بار كينو فارحاد نۇرسۇلتان ۇلىنىڭ ونەردەگى جولىن نىقتاي ءتۇستى دەي الامىز.
«جامبىلدىڭ جاستىق شاعى» 1996-جىل
بۇگىنگى «اسىل ارنا» تەلەارناسىنىڭ ديرەكتورى مۇحامەدجان تازابەكوۆ جامبىل اتامىزدىڭ جاستىق شاعىن قايتا جاڭعىرتقانداي بولدى. 1996-جىلى قانىمبەك قاسىمبەكوۆتىڭ رەجيسسەرلىگىمەن تۇسىرىلگەن «جامبىلدىڭ جاستىق شاعى» فيلمى جىر الىبىن مۇلدەم باسقا قىرىنان تانىتتى.
بەلگىلى ايتىسكەر اقىن مۇحامەدجان تازابەكوۆ جامبىل اقىننىڭ جاستىق شاعىن سومداپ، اقىننىڭ شىنايى بولمىسىن اشىپ كورسەتتى. ايتىس ونەرىندە جۇيرىكتىگىمەن تانىلعان بوزبالانىڭ كينوداعى ءساتتى قادامى ەل الدىندا تانىلۋىنا سەپ بولدى. ال سىزدەر 90-جىلدارداعى قازاق كينو ونەرىنىڭ جارىق جۇلدىزدارى دەپ كىمدەردى ايتار ەدىڭىزدەر؟
baistars.kz
