جامبىل وبلىسىنىڭ شارۋاشىلىقتارى كوكتەمگى ەگىسكە 90 پايىز دايىن

تاراز. قازاقپارات - ءوڭىر باسشىسى كارىم كوكىرەكبايەۆتىڭ توراعالىعىمەن وتكەن وبلىس اكىمدىگىنىڭ كەزەكتى القا وتىرىسىندا اۋىل ەڭبەككەرلەرىنىڭ كوكتەمگى- دالالىق جۇمىستارعا ازىرلىگى تالقىلاندى.

 بۇل تۋرالى جامبىل وبلىسى اكىمىنىڭ باسپا ءسوز قىزمەتىنەن حابارلادى.

ەرتە باستالعان كوكتەم جامبىلدىق اگرارشىلاردى جاقىن كۇندەرى القاپتارعا شىعۋعا اسىقتىرۋدا.

 بۇگىنگى كۇنى اۋدانداردىڭ كوكتەمگى- دالالىق جۇمىستارعا ازىرلىگى % 90- دى قۇرايدى. تراكتورلار، كومبايندار جانە باسقا دا تەحنيكا ازىرلىك ساپىنا قويىلدى. جانار- جاعار مايلارى مەن تۇقىمدىق قور تولىق ازىرلەندى. قىس كەزىندە القاپتاردا جەتكىلىكتى ىلعال جينادى، دەپ باياندادى وبلىستىق اۋىل شارۋاشىلىعى باسقارماسىنىڭ باستىعى نۇرجان نۇرجىگىتوۆ.

 وبلىس اكىمى ك. كوكىرەكبايەۆ ايماقتىڭ اۋىل شارۋاشىلىعى جەرلەرى ءتيىمدى پايدالانىلماي وتىرعانىنا نازار اۋداردى. ماسەلەن، 2015 -جىلى  1100 گەكتار سۋارمالى جەرلەر پايدالانىلماي قالدى.

سونىمەن بىرگە رەسپۋبليكانىڭ باسقا ايماقتارىمەن سالىستىرعاندا جامبىلدىق القاپتار ءتۇسىمى تومەن بولىپ وتىر. «وتكەن جىلى وبلىس بويىنشا ءداندى داقىلداردىڭ ءتۇسىمى گەكتارىنا 16 سەنتنەردى قۇرادى، ال كورشىلەس الماتى وبلىسىنىڭ «بايسەركە» شارۋاشىلىعىندا گەكتار اينالىمى 90 سەنتنەرگە جەتتى. جۋالى اۋدانىندا كارتوپ وسىرۋگە تولىعىمەن قولايلى جاعدايلار بار. الايدا بۇل داقىلدىڭ ءتۇسىمى وتە تومەن، گەكتارىنا نەبارى 25 سەنتنەردەن كەلەدى، ال تابيعاتى قاتال ەرتىس وڭىرىندە بۇل كورسەتكىش 70 سەنتنەرگە جۋىقتايدى»، - دەپ اتاپ ءوتتى ك. كوكىرەكبايەۆ.

 ول جامبىل وبلىسىنىڭ قولايلى كليماتتىق جاعدايلارى سۇرانىسقا يە ونىمدەردەن جوعارى ەگىن جيناۋعا مۇمكىندىك بەرەدى، ال تەز پىسەتىن داقىلداردان ەكى رەتتەن ءونىم جيناپ الۋعا بولادى، دەپ اتاپ ءوتتى. «اۋداندار اكىمدەرى، اۋىل شارۋاشىلىعى ماماندارى بۇل ىستە ءتيىستى ىجداعاتتىلىق كورسەتۋى ءتيىس»، - دەدى ءوڭىر باسشىسى.