وبىرعا قارسى جاڭا ءادىس ارقىلى ەمدەلگەندەردىڭ 90 پايىزى ايىعىپ كەتتى
وزدەرىنىڭ ريەۆوليۋتسيالىق جاڭالىعى تۋرالى ولار ۆاشينگتوندا وتكەن باسپا ءسوز ءماسليحاتى كەزىندە ايتتى، - دەپ حابارلايدى بي- بي- سي.
جاڭا ءادىس ادام اعزاسىنا وبىر جاسۋشالارىمەن كۇرەسەتىن يممۋندىق جۇيەنى ەنگىزۋگە نەگىزدەلگەن. تاجىريبە بارىسىندا بىرنەشە ەمدەلۋشىدەن ت- كيللەر (ت- جاسۋشالار توبىنان تۇرادى. ولار بۇزىلعان جاسۋشالاردى، ونىڭ ىشىندە قاتەرلى ىسىك جاسۋشالارىن جويادى) دەپ اتالاتىن يممۋندىق جاسۋشالار الىندى. بۇل جاسۋشالار زەرتحانادا ادامنىڭ قاتەرلى ىسىك جاسۋشالارىن تاۋىپ، ونى جوياتىنداي ەتىپ قايتا باعدارلامالانادى. وسىدان كەيىن جاسۋشالار ناۋقاستىڭ قانىنا قايتادان جىبەرىلەدى.
زەرتتەۋ توبىنىڭ جەتەكشىسى، پروفەسسور ستەنلي ريددەللدىڭ ايتۋىنشا، جاڭا ءادىس بۇرىن ەشقانداي جولمەن ەمدەلە الماعان ادامداردى قۇتقارعان. «وسى ءادىس ارقىلى ەمدەلگەندەردىڭ جاسۋشالارىنان اققاننىڭ (لەيكەميا) بەلگىلەرى تابىلمادى، ياعني قاتەرلى ىسىككە شالدىققان قان جاسۋشالارى تۇگەلدەي جويىلدى. بۇل تەڭدەسى جوق ناتيجە»، - دەدى ول. سونىمەن قاتار، عالىم وسى تەراپيانى قابىلداعان ەكى ناۋقاستىڭ قايتىس بولعانىن مالىمدەدى.
جاڭا ءادىس تولىق جاريالانباعاندىقتان، باسقا عالىمدار مۇنىڭ نەگىزىن تولىق تۇسىنە الماي وتىر.
لەيلا ريچاردس - جاڭا ءادىس ارقىلى ەمدەلىپ شىققانداردىڭ ءبىرى.
«ءبىز بىرنەشە ۋاقىتتان بەرى وسى تەحنولوگيانى قولدانىسقا ەنگىزۋ ءۇشىن جۇمىس ىستەپ جاتىرمىز. بۇل تەك اققان دەرتىنە شالدىققاندارعا پايدالى بولعاندىقتان، ەندى ونى وبىردىڭ باسقا تۇرىمەن اۋىراتىندارعا پايدالانۋ جولىن تابۋدى ماقسات ەتتىك»، - دەدى قاتەرلى ىسىك اۋرۋلارىن زەرتتەۋ ورتالىعىنىڭ دوكتورى الان ۆورسلي.
Kaz.tengrinews.kz
قاتەرلى ىسىككە قارسى جاڭا ءادىستىڭ جۇمىس ىستەۋ بارىسى.
