قورعاستاعى تاۋار اينالىمى 90 ەسە ۇلعايعان

استانا. قازاقپارات- قازاقستان مەن قىتايدىڭ شەكاراسىنداعى ىنتىماقتاستىق قارقىندى دامىپ كەلەدى. بيىل تەك ءتورت ايدا قورعاستا ەكى ەل اراسىنداعى تاۋار اينالىمى 140 ميلليون دوللارعا جەتتى.

بۇل كورسەتكىش وتكەن جىلدىڭ وسى كەزەڭىمەن سالىستىرعاندا 90 ەسە ارتقان. قىتاي تاراپى ورتالىق ازيا ەلدەرىمەن ارىپتەستىكتى ودان ءارى دامىتا تۇسەمىز دەپ وتىر.

 كورشى ەل قورعاستا قوناقۇيلەر، ءىرى ساۋدا ورىندارى مەن قارجىلىق قىزمەت كورسەتەتىن ورتالىقتار سالىپ جاتىر. ولاردىڭ ءبىرازى بيىل پايدالانۋعا بەرىلەدى. قازىردىڭ وزىندە قىتايلىق ساۋداگەرلەر قۇرىلىس ماتەريالدارى، ەلەكترونيكا، اۆتوبولشەكتەر، ماتا بۇيىمدارىن ساۋدالاپ جاتسا، قازاقستاندىق كاسىپكەرلەر نەگىزىنەن ازىق- تۇلىك شىعارۋدا.

حايشا مۋحابەك، « قورعاس» شەكارالىق ارىپتەستىك ورتالىعى كەدەندىك دەپارتامەنتىنىڭ باسشىسى:

 - بيىل 4 ايدا شەكارادان وتكەن ازاماتتاردىڭ سانى 903 مىڭنان استى. بۇل وتكەن جىلمەن سالىستىرعاندا % 177 عا ارتىق. قورعاس ارقىلى وتكەن تاۋار كولەمى 12 مىڭ تونناعا جەتتى، بۇل 60 ەسەگە ءوستى دەگەن ءسوز. مۇنىڭ بارلىعىنا ساۋدا ورىنداردىڭ كوبەيۋى عانا ەمەس، شىنجاڭ تۇرعىندارىنىڭ قورعاس ايماعىنا جەكە تولقۇجاتىمەن كىرىپ- شىعۋعا رۇقسات بەرەتىن جاڭا ءتارتىپ اسەر ەتتى.

www.24.kz