قىتايدان 90 ميلليون تەڭگەلىك تاۋاردى جاسىرىن جولمەن وتكىزبەك بولعاندار انىقتالدى
بۇل تۋرالى بۇگىن بريفينگتە ق ر ق م ك ب ك كونترابانداعا قارسى كۇرەس باسقارماسى باسشىسىنىڭ ورىنباسارى ەردەن جۇما ءمالىم ەتتى.
«جەدەل ىزدەستىرۋ شارالارىنىڭ ناتيجەسىندە كەدەندىك دەكلاراتسيالارىندا اكەلىنەتىن سالىق سالىناتىن تاۋارلاردىڭ ورنىنا سالىعى از تولەنەتىن تاۋارلارى كورسەتىلەتىن سحەما بەلگىلەنگەن (جاسىرىن تاۋارلار).
اعىمداعى جىلعى 15 - شىلدەدە كەدەندىك باقىلاۋ كوميتەتى كونترابانداعا قارسى كۇرەس باسقارماسىنىڭ جەدەل ارەكەت ەتەتىن موبيلدىك توبى مەن الماتى وبلىسى بويىنشا ك ب د قىزمەتكەرلەرى جەدەل اقپاراتتى پىسىقتاۋ شەڭبەرىندە الماتى وبلىسى ەڭبەكشى قازاق اۋدانىنىڭ سايماساي كەنتىندە ورنالاسقان وندىرىستىك بازانىڭ اۋماعىندا ق ح ر-دان جۇك ماشيناسىمەن اكەلىنگەن حالىق تۇتىناتىن تاۋارلاردى زاڭسىز قايتا تيەۋ فاكتىسىن انىقتادى»، - دەدى ول.
ە. جۇمانىڭ سوزىنە قاراعاندا، كولىكتىڭ شاناعىن تەكسەرۋ بارىسىندا كەدەندىك دەكلاراتسيادا كورسەتىلگەن كافەل مەن اينەك ماقتاسىنىڭ ورنىنا باعاسى قىمبات تۇراتىن حالىق تۇتىناتىن تاۋارلار انىقتالدى. وسى ورايدا جالپى سوماسى 90 ميلليون تەڭگەدەن استام سوماعا كيىم، پلانشەت، ساعات، ۇيالى تەلەفون مەن وعان ارنالعان اكسەسسۋارلار جەتكىزىلگەنى بەلگىلى بولدى.
«قازىرگى ۋاقىتتا بۇل ىسكە كەدەن جانە باسقا دا قۇقىق قورعاۋ ورگاندارى قىزمەتكەرلەرىنىڭ قاتىستىلىعى تەكسەرىلۋدە. اتالعان فاكتى بويىنشا ق ر ق ك 209-بابى 3-بولىگىنىڭ «ب» تارماعى، ياعني ۇيىمداسقان توپپەن جاسالعان ەكونوميكالىق كونتراباندا بويىنشا قىلمىستىق ءىس قوزعالدى، تەرگەۋ امالدارى جۇرگىزىلۋدە»، - دەدى ول.
اۆتور: رۋسلان عابباسوۆ
