وڭتۇستىك قازاقستاننان سولتۇستىككە بيىل 900 دەي وتباسى كوشۋدى جوسپارلاپ وتىر
مەملەكەت قولداۋىمەن قولعا الىنعان باعدارلاما بويىنشا وتكەن جىلى 250 وتباسى قونىس اۋدارعان بولاتىن. ءسويتىپ تەرىسكەيدەگى ەلگە ەل قوسىلىپ، جۇمىس كۇشى تولىقتىرىلدى. وسىنداي جەتىستىككە كوڭىلى تولعان سولتۇستىكتەگى ايماق وكىلدەرى بيىل حالقى تىعىز ورنالاسقان ماقتارال جۇرتىمەن كەزدەسىپ، بوس جۇمىس ورىندارىنىڭ جارمەڭكەسىن ۇيىمداستىردى، دەپ حابارلايدى قازاقپارات ح ا ا ءتىلشىسى.
«سەرپىن» - ەلگە سەرپىن بەرەتىن جوبا. ەلباسى جولداۋىنداعى ەڭبەك نارىعىن دامىتۋ بويىنشا قولعا الىنعان ءىس وسىلايشا قارقىن الا باستادى. «ماقتارال وڭىرىمىزدەگى حالقى تىعىز اۋدان بولعاندىقتان، كەزدەسۋدى وسى اۋماقتان باستادىق. 3 كۇندىك ءوڭىرارالىق سەمينار وتكىزىپ، سوڭى جارمەڭكەگە ۇلاستى. ايماقارالىق ەكونوميكالىق قارىم- قاتىناستى ارتتىرۋ ءۇشىن دەلەگاتسيا قۇرامىندا بيزنەس وكىلدەرى دە كەلىپ وتىر. 636 جۇمىس بەرۋشى باس- اياعى 1785 بوس جۇمىس ورنىن ۇسىنۋدا»، - دەدى وبلىس اكىمىنىڭ ورىنباسارى ەربول سادىر.
ماقتارالدا بۇگىندە 350 مىڭعا جۋىق حالىق تۇرادى. سونىڭ 8 مىڭدايى جۇمىسسىز. ال، تۇرعىن ءۇي كەزەگىنە 300 ازامات تىركەلگەن. سوندىقتان شالعايداعى اۋدان تۇرعىندارىنا سولتۇستىككە كوشۋ ءتيىمدى بولماق. «اۋداندا جىلىنا ون مىڭعا جۋىق ءسابي ومىرگە كەلەدى. ءۇي بەرسە، ارينە بارادى. ول جاق اگرارلى ايماق بولعان سوڭ، وسى باعىتتاعى جۇمىسشىلار وتە قاجەت. سونداي- اق، مۇعالىمدەر، دەنساۋلىق ساقتاۋ سالالارىندا دا مامان تاپشى ەكەن»، - دەيدى ماقتارال اۋدانى اكىمىنىڭ ورىنباسارى التىن ەشانقۇلوۆا.
سولتۇستىك قازاقستان وبلىسىنان كەلگەن كاسىپكەرلەر بولسا، جەكە شارۋا قوجالىقتارىنا جۇمىسشىلار تاپشى ەكەنىن ايتىپ وتىر. اسىرەسە، مال باعىپ، ءتورت تۇلىككە كۇتىم جاسايتىن شارۋالار قاجەتتىلىگى تۋىنداعان.
«مالدى باعىپ، ونىڭ ءسۇتىن، ەتىن ساتامىز. ۇيمەن قامتاماسىز ەتەمىز. ازىق- تۇلىگى تەگىن. ەكەۋارا كەلىسىپ، نەسيەگە وزىنە دە مال السىن. ءسويتىپ، قورا بار، جاي بار. ەكەۋمىزگە دە جەتەدى. مالىن كوبەيتسىن. ايلىق تولەيمىز»، - دەيدى جەكە كاسىپكەر ەرلان دۇيسەنوۆ.
اۆتور: اينۇر اقبايەۆا
