الماتىداعى سەل تاسقىنى سالدارىنان 900 ادام قاۋىپسىز ايماققا كوشىرىلدى - فوتو
بۇل تۋرالى بۇگىن استانادا وتكەن بريفينگتە ءى ءى م توتەنشە جاعدايلار كوميتەتى ءتوراعاسىنىڭ مىندەتىن اتقارۋشى سەرىك اۋباكىروۆ ءمالىم ەتتى.
«قازىرگى تاڭدا توتەنشە جاعدايدىڭ سالدارىن جويۋعا ءى ءى م جەكە قۇرامى مەن جەرگىلىكتى اتقارۋشى ورگاننىڭ 1196 ادامى، 160 تەحنيكا، 3 تىكۇشاق جۇمىلدىرىلدى»، - دەدى بۇگىن بريفينگ بارىسىندا سەرىك اۋباكىروۆ.
ەسكە سالا كەتەيىك، الدىن الا مالىمەتتەرگە قاراعاندا، الماتى قالاسىندا ورىن العان سەل تاسقىنى كۇننىڭ كۇرت ىسۋى سالدارىنان تاۋ ىشىندەگى مورەنالىق كولدىڭ ارناسىنان اسۋىنان ورىن العان. توتەنشە وقيعا بۇگىن 23- شىلدە كۇنى تۇنگى ساعات 03:00 شاماسىندا ورىن الىپ، كولدەگى بوگەتتىڭ بۇزىلۋىنان 40 مىڭ تەكشە مەتر سۋ اسقان. تاسقىن سۋ قارعالى وزەنىن قۇيىپ، ودان اسقان سۋ الماتى قالاسىنىڭ ءۇش اۋدانىن ءىشىنارا باسىپ قالدى. سونىڭ ىشىندە ناۋرىزباي اۋدانى سەل تاسقىنىنان كوبىرەك جاپا شەگىپ وتىر.
«قاز سەلدەن قورعاۋ» ماماندارىنىڭ ايتۋىنشا، الماتى جۇرتشىلىعى ءۇشىن دۇرلىگۋگە ەش نەگىز جوق. سەلدەن قورعاۋ نىساندارى بەرىك، ولارعا ەشقانداي دا سىزات ءتۇسىپ، زاقىم كەلمەگەن. دەگەنمەن، ماماندار قارعالى وزەنىندەگى ارتىق سۋدى بىرتىندەپ اۋدارۋ جۇمىستارىن جۇرگىزۋدە. اتاپ ايتقاندا، قارعالى وزەنى بويىمەن ارتىق سۋلار شليۋزدەر ارقىلى تومەن قاراي اۋدارىلىپ جاتىر. سەلدىڭ سالدارىن جويۋ جۇمىستارى جالعاسۋدا.
«قارعالى وزەنى بوگەتى ماڭىنان 898 جەرگىلىكتى تۇرعىندار قاۋىپسىز ايماققا كوشىرىلدى. ورىن العان جاعدايدى ءجىتى باقىلاۋ ءۇشىن اۋەدەن باقىلاۋ جالعاسۋدا. قالپىنا كەلتىرۋ، تازارتۋ جۇمىستارى دا جۇزەگە اسىپ جاتىر. بۇدان بولەك، سۋ باسقان كوشەلەر، اۋلالار مەن قالانىڭ شاعىن اۋداندارىنداعى توتەنشە وقيعانىڭ كەلتىرگەن شىعىندارىن باعالاۋ جۇمىسى جالعاسادى»، - دەدى ت ج ك وكىلى.
ايتا كەتەرلىگى، «قاز سەلدەن قورعاۋ» مەكەمەسىنىڭ مالىمەتىنە قاراعاندا، بوگەننىڭ تۇتاستىعىنا ەش سىزات تۇسكەن جوق، ارتىق سۋ شليۋزدەر ارقىلى اۋدارىلىپ جاتىر.
اۆتور: قانات مامەتقازى ۇلى
