الەم چەمپيوناتىندا قازاقستان قۇراماسى 9 التىن، 10 كۇمىس جانە 10 قولا مەدال جەڭىپ الدى

استانا. قازاقپارات - ءساۋىر ايىندا ءابۋ-دابيدە وتكەن دجيۋ-دجيتسۋ بويىنشا الەم چەمپيوناتىندا قازاقستان قۇراماسى 9 التىن، 10 كۇمىس جانە 10 قولا مەدال جەڭىپ الدى.

بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە «قازاقستان دجيۋ-دجيتسۋ جانە گرەپپلينگ» فەدەراتسياسى ۆيتسە-پرەزيدەنتى، برازيليالىق دجيۋ-دجيتسۋ سپورت ءتۇرى بويىنشا قازاقستان قۇراماسىنىڭ باس جاتتىقتىرۋشىسى ارمانجان رۋزاحۋنوۆ ايتتى.

«ءساۋىر ايىندا ءابۋ-دابيدە وتكەن دجيۋ-دجيتسۋ بويىنشا الەم چەمپيوناتىندا قازاقستان قۇراماسى 9 التىن، 10 كۇمىس جانە 10 قولا مەدال جەڭىپ الدى. بۇل جەتىستىك قازاقستان قۇراماسىن ەڭ مىقتى ءۇش كوماندانىڭ قاتارىنا قوستى. وزدەرىڭىز بىلەسىزدەر، قازاقستاندا دجيۋ-دجيتسۋدىڭ دامىپ كەلە جاتقانىنا كوپ بولعان جوق. سوندىقتان ءابۋ-دابيدە وتكەن چەمپيونات ماڭىزدى وقيعا بولدى. جالپى بۇل سپورت ءتۇرى بويىنشا فەدەراتسيا ەكى جىلدان بەرى جۇمىس ىستەپ كەلەدى. وسى از ۋاقىت ىشىندە كوپ ءىس اتقاردىق جانە سولاردىڭ ناتيجەلەرىن كورىپ وتىرمىز»، - دەيدى ا. رۋزاحۋنوۆ.

ونىڭ ايتۋىنشا، الەم چەمپيوناتىنا ەلىمىزدىڭ اتىنان 78 سپورتشى قاتىستى. سونىڭ ىشىندە استانا قالاسىنىڭ كومانداسى 4 التىن، 4 كۇمىس جانە 1 قولا جۇلدە جەڭىپ الدى.

«ءبىز بىلتىر دا ەڭ مىقتى ءۇش كوماندانىڭ قاتارىندا بولعانبىز. ءبىراق، وتكەن جىلعى جارىستا جالپى قاتىسقان سپورتشىلار سانى از بولعان ەدى. بىلتىر مىڭنان استام سپورتشى قاتىسسا، بيىل جۇلدە ءۇشىن تالاسقاندار سانى ءتورت مىڭ ادامعا جۋىقتادى. وسىعان قاراپ، دجيۋ-دجيتسۋ سپورتى قانشالىقتى دامىپ كەلە جاتقانىن جانە ونداعى باسەكەنىڭ قانشالىقتى مىقتى ەكەنىن بايقاۋعا بولادى»، - دەيدى ا. رۋزاحۋنوۆ.

اۆتور: ءابۋ-اسقار مەكەش ۇلى