بيىل 8 مىڭنان استام ەتنيكالىق قازاق قانداس مارتەبەسىن الدى

استانا. قازاقپارات - جىل باسىنان بەرى 8034 ەتنيكالىق قازاق تاريحي وتانىمەن تابىسىپ، قانداس مارتەبەسىن الدى. جالپى 1991 -جىلدان بەرى رەسپۋبليكاعا 1 ميلليون 115,1 مىڭ ەتنيكالىق قازاق ورالدى، دەپ حابارلايدى قازاقپارات ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.

جىل باسىنان قازاقستانعا كەلگەن قانداستاردىڭ جارتىسى (%54,2) وزبەكستاننان، % 20,1 - قىتايدان، % 11 - رەسەيدەن، % 6,4 - موڭعوليادان، % 4,9 - تۇرىكمەنستاننان جانە % 3,3 باسقا ەلدەردەن قونىس اۋدارعان.

ەلىمىزگە كەلگەن ەتنيكالىق قازاقتار نەگىزىنەن الماتى (%27,8)، ماڭعىستاۋ (%12,8)، تۇركىستان (%6,4) جانە جامبىل (%4,8) وبلىستارىنا، سونداي- اق استانا (%10,7)، الماتى (%8,8) جانە شىمكەنت (%7,1) قالالارىنا قونىستاندى.

وسى جىلعى 1-ماۋسىمداعى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى % 67,5- دى، ەڭبەككە قابىلەتتى جاستان كىشى % 23,8- دى جانە زەينەتكەرلەر % 8,7- دى قۇرايدى.

ەڭبەككە قابىلەتتى جاستاعى قانداستاردىڭ ىشىنەن ءبىلىم دەڭگەيى بويىنشا % 17,3- ى جوعارى ءبىلىمدى، % 37- ى ورتا كاسىبي ءبىلىمدى، % 38,4- ى جالپى ورتا ءبىلىمدى جانە % 7,3- ىنىڭ ءبىلىمى جوق.

ەسكە سالا كەتەيىك، قانداستاردى قونىستاندىرۋ ءۇشىن كەلەسىدەي ەڭبەك كۇشى تاپشى وڭىرلەر انىقتالدى: اقمولا، اباي، قوستاناي، پاۆلودار، شىعىس جانە سولتۇستىك قازاقستان وبلىستارى.

قونىستاندىرۋ وڭىرلەرىندە 2023 -جىلعا ارنالعان قانداستاردى قابىلداۋ كۆوتاسى 1925 ادامدى قۇرايدى. 2023 -جىلعى 1- ماۋسىمداعى جاعداي بويىنشا قونىستاندىرۋ وڭىرلەرىنە 787 قانداس قونىس اۋداردى. قانداستار اعىنى ۇلعايعان كەزدە قونىستانۋ ايماقتارىندا قابىلداۋ ءۇشىن كۆوتا مولشەرى ۇلعايتىلۋى مۇمكىن.

جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى - ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 ا ە ك (241,5 مىڭ تەڭگە) مولشەرىندە؛ تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە - ءبىر جىل ىشىندە 15-تەن 30 اەك (51,7-دەن 103,5 مىڭ تەڭگەگە دەيىن) مولشەرىندە.

سونىمەن قاتار ەرىكتى قونىس اۋدارۋدىڭ تيىمدىلىگىن ارتتىرۋ ماقساتىندا ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلداندى. تۇرعىن ءۇي ساتىپ الۋ، سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ % 50- ى نەمەسە ءبىر وتباسىنا 4 ميلليون تەڭگەگە دەيىن مولشەرىندە ءبىرجولعى وتەۋسىز جانە قايتارىمسىز نەگىزدە ەنگىزىلدى.