الماتىدا 8-قاباتتان قۇلاعان جىگىت امان قالدى
الماتى قالالىق قوعامدىق دەنساۋلىق ساقتاۋ باسقارماسى مالىمەتىنشە، 8-قاباتتان قۇلاعان 19 جاستاعى جىگىت اۋرۋحانانىڭ قابىلداۋ بولىمىنە اسا اۋىر حالدە جەتكىزىلگەن.
پاتسيەنت شۇعىل تۇردە جانساقتاۋ بولىمىنە جاتقىزىلدى.
دارىگەرلەر ونىڭ ميى شايقالىپ، جابىق باس-مي جاراقاتىن، ءبىرىنشى-ەكىنشى دارەجەلى تراۆماتيكالىق شوك العانىن جانە كوپ سۇيەكتەرى سىنعانىن انىقتادى.
وعان مىندەتتى الەۋمەتتىك مەديتسينالىق ساقتاندىرۋ شەڭبەرىندە ەكى وتا جاسالدى.
ورتالىق قالالىق كلينيكالىق اۋرۋحانانىڭ ورتوپەديا ءبولىمى مەڭگەرۋشىسى قانات تاۋەكەلوۆتىڭ ايتۋىنشا، جانساقتاۋ قىزمەتكەرلەرى الدىمەن پاتسيەنتتى جاراقات سالدارىنان بولعان شوكتان ارىلتقان.
ەكى كۇن وتكەن سوڭ دارىگەرلەر وتا جاساۋ جونىندە شەشىم قابىلدادى.
«ەكى كەزەڭدە بىرنەشە وپەراتسيا جاسالدى. ءبىرىنشى وتا «سىنعان جامباس سۇيەگىن اشىق رەپوزيتسيالاۋ، پلاستينامەن جانە بۇراندالارمەن بەكىتۋ» دەپ اتالادى. ناۋقاس ەسىن جيىپ، جاعدايى جاقسارعان سوڭ ەكىنشى وتا جاسالدى. بۇل وپەراتسيا بارىسىندا سۇيەك تىندەرىن سىنعان جەردەن ءبىر-بىرىنە جالعاپ، مەتالل كونسترۋكتسيالاردىڭ كومەگىمەن جالعادىق»، - دەدى قانات تاۋەكەلوۆ.
ونىڭ سوزىنە سەنسەك، جوعارى تەحنولوگيا كومەگىمەن جاسالعان وپەراتسيا اسا كۇردەلى مانيپۋلياتسيالار قاتارىنا جاتادى.
مۇنداي وتا ءمامس پاكەتى شەڭبەرىندە عانا جاسالادى.
«ءبىز پاتسيەنتتى ەمدەۋ بارىسىندا ونىڭ ءومىرىن ساقتاپ قالۋدى باستى ماقسات ەتىپ قويدىق. سونىمەن قاتار مۇگەدەك بولىپ قالماۋى ءۇشىن بارىمىزدى سالدىق. ناتيجەسىندە ناۋقاستىڭ ءومىرىن ساقتاپ قانا قويماي، اياققا تۇرعىزدىق. ايتۋ كەرەك، پاتسيەنت وپەراتسيادان سوڭ ەكىنشى كۇنى- اق ءجۇرىپ كەتتى. ورتالىق قالالىق كلينيكالىق اۋرۋحانادا رەابيليتاتسيادان ءوتتى. بۇگىندە اۋرۋحانادان شىققان جاس جىگىت ءوز بەتىنشە ءجۇرىپ- تۇرادى»، - دەدى دارىگەر.
