قازاقستاندا كاسىپتىك پاتولوگياسى بار 8 مىڭنان استام ادام تىركەلگەن
سپيكەردىڭ ايتۋىنشا، قازاقستاندا كاسىپتىك پاتولوگياسى بار 8168 ادام تىركەلگەن. ال، قاۋىپتى ەڭبەك جاعدايلارىندا جۇمىس ىستەيتىن جۇمىسكەرلەردىڭ ەڭ كوپ سانى قاراعاندى وبلىسىندا - 42 پايىز، پاۆلودار وبلىسىندا - 43 پايىز، ماڭعىستاۋ وبلىسىندا - 38 پايىز، شىعىس قازاقستان وبلىسىندا - 26,9 پايىز، جامبىل وبلىسىندا - 26,4 پايىز.
كاسىپتىك اۋرۋلاردىڭ ەڭ جوعارى كورسەتكىشتەرى «قازاقمىس كورپوراتسياسى» ج ش س، «ارسەلورميتتال تەمىرتاۋ» ا ق، «ۆوستوكتسۆەتمەت» ج ش س، «قازتسينك» ج ش س، «قازفوسفات» ج ش س ج ف كاسىپورىندارىندا بايقالادى.
جۇمىسكەرلەردىڭ 30,2 پايىز ەكىدەن كوپ اۋرۋمەن اۋىرادى، بۇل زياندى فاكتورلار كەشەنىنىڭ جۇمىسكەرلەر اعزاسىنا اسەر ەتۋىمەن بايلانىستى، ءبىر ناۋقاسقا ەكى، ءۇش جانە ودان دا كوپ دياگنوز قويىلادى.
«2021-2022 ج. ج. رەسپۋبليكادا كاسىپتىك اۋرۋشاڭدىقتىڭ ارتۋى بايقالدى. تىركەلگەن كاسىپتىك اۋرۋشاڭدىق دەڭگەيى ناقتى جاعدايدى كورسەتپەيتىنى جانە قازىرگى قازاقستانداعى ەڭبەك جاعدايلارىنىڭ شارتتارىنا سايكەس كەلمەيتىنى انىق»، - دەدى ساۋلە اقىنجانوۆا كاسىپوداقتار فەدەراتسياسى ۇيىمداستىرعان «قاۋىپسىز جۇمىس ورنى - ءومىر مەن دەنساۋلىقتى ساقتاۋدىڭ نەگىزى» اتتى دوڭگەلەك ۇستەل بارىسىندا.
ول كاسىپتىك مەديتسينا مەن كاسىپتىك پاتولوگيا قىزمەتىن ۇيلەستىرەتىن ۇيىم - گيگيەنا جانە كاسىپتىك اۋرۋلار ۇلتتىق ورتالىعىن قالپىنا كەلتىرۋدى جەدەلدەتۋ، سونداي-اق، ەلىمىزدىڭ ايماقتارىندا كاسىپتىك مەديتسينانى جانداندىرۋ قاجەت دەپ سانايدى.
بۇعان دەيىن ەڭبەك جانە حالىقتى الەۋمەتتىك قورعاۋ مينيسترلىگى ءمالىم ەتكەندەي، قازاقستاندا جىل سايىن كاسىپورىنداردا 1500 دەن استام جازاتايىم وقيعاعا جول بەرىلەدى، ونىڭ 200 گە جۋىعى ولىممەن اياقتالادى.