باس پروكۋرور قاڭتار وقيعاسى تۋرالى: ءبىر كۇندە 8 وبلىستىڭ اكىمدىگىنە شابۋىل جاسالدى

None
استانا. قازاقپارات – ق ر باس پروكۋرورى بەرىك اسىلوۆ ماجىلىستە قاڭتار وقيعاسىنا قاتىستى دەپۋتاتتار ساۋالىنا جاۋاپ بەردى، دەپ حابارلايدى قازاقپارات ءتىلشىسى.

وتكەن اپتادا ءماجىلىس دەپۋتاتى ەدىل جاڭبىرشين قاڭتار وقيعاسىنا قاتىستى حالىقتىڭ كوكەيىندە جۇرگەن سۇراقتارعا ءتيىستى كۇشتىك قۇرىلىمدار مەن مەملەكەتتىك ورگانداردىڭ باسشىلارى ماجىلىسكە كەلىپ جاۋاپ بەرۋىن تالاپ ەتكەن بولاتىن.

«قاڭتار وقيعاسى بۇكىل ەلدى ءدۇر سىلكىندىرىپ، بارىمىزگە ۇلكەن سىن بولدى. بۇگىندە قولىمىزدا تولىق مالىمەتتەر بار. تەرگەۋ ورگاندارى وقيعا حرونولوگياسىن، نەگىزگى ۇيىمداستىرۋشىلاردى انىقتادى. ولاردىڭ ىشىندە جوعارى لاۋازىمدى ادامدار مەن ۇيىمداسقان قىلمىستىق توپ مۇشەلەرى دە بولدى. بارلىق قازا بولعانداردىڭ كىم ەكەنىن، ولاردىڭ قايتىس بولۋ سەبەپتەرىن زەرتتەدىك. قارۋ-جاراقتى ىزدەۋ جالعاسۋدا. قىلمىسكەرلەردى جاۋاپقا تارتۋدامىز. ولاردىڭ ىشىندە قىزمەت مۇددەسىندە وپاسىزدىق جاساپ، ازاماتتاردىڭ قاۋىپسىزدىگىن قامتاماسىز ەتپەگەندەر دە بار. ازاپتاۋ بويىنشا ىستەردى اياقتاپ جاتىرمىز»، - دەدى بەرىك اسىلوۆ ءماجىلىستىڭ بۇگىنگى وتىرىسىندا.

باس پروكۋراتۋرا سول وقيعالاردى، ولاردىڭ سالدارىن ەسكە سالۋ ءۇشىن قاڭتار وقيعاسى تۋرالى بەينەروليك ۇسىندى. بەينەروليك مالىمەتىنە سايكەس، قاسىرەتتى قاڭتاردا ەلىمىز بويىنشا 5149 ادام جارالانىپ، 238 ادام مەرت بولدى. ولاردىڭ 19 ى - كۇشتىك قۇرىلىمداردىڭ قىزمەتكەرلەرى.

«بۇل كۇنى قاسيەتتى تاۋەلسىزدىگىمىزگە وراسان زور قاتەر ءتوندى. كوپتەگەن ءىرى قالالاردىڭ عيماراتتارى ورتكە ورانىپ، استاڭ- كەستەڭ بولدى. باستى قۇندىلىعىمىز - ادام ومىرىنە قاۋىپ ءتوندى. پرەزيدەنت قابىلداعان باتىل قيمىلدار ناتيجەسىندە عانا ەلگە تونگەن قاۋىپ- قاتەردىڭ بەتى قايتتى. ول كۇندەرى بارلىق زاڭناما بۇزىلدى. وكىنىشكە وراي، قوعامدا بەيبىت ميتينگ وتكىزۋ مادەنيەتى قالىپتاسپاعانىن مويىنداۋىمىز قاجەت. ادامدار جينالىپ، كوشەگە شىققاندا، بەيبىت ميتينگ تۋرالى زاڭنىڭ بارلىق نورمالارى بۇزىلدى»، - دەدى باس پروكۋرور.

ونىڭ ايتۋىنشا، ۇيىمداستىرۋشىلار اكىمدىكتى حاباردار ەتپەي، مىڭداعان ادام جينالدى. WhatsApp پەن Telegram ارقىلى تارتىپسىزدىككە قاتىسۋشىلاردىڭ جينالۋى مەن قوزعالىسىن ۇيلەستىرگەن.

«الماتىدا ساناۋلى ساعات ىشىندە ءبىر توپتىڭ عانا ىشىندە قاتىسۋشىلار سانى 5,5 مىڭعا دەيىن كوبەيدى. سول سياقتى جامبىل وبلىسىندا قاتارداعى قاتىسۋشىلار سانى 4 مىڭعا دەيىن ءوستى. كەيىن توبىر اسەرى ورىن الدى. ادامدار پوليتسيانىڭ زاڭدى تالاپتارىن ورىنداماي، قارسىلىق كورسەتتى، ورتەدى، تونادى جانە كۇش قولداندى. بۇل ءۇشىن الماتىدا ارنايى كورشى وبلىستاردان ادامدار كەلە باستادى.

كەيىن جاعداي ۋشىعا ءتۇستى. تەك ءبىر كۇنى 5-قاڭتاردا 8 وڭىردە اكىمدىككە شابۋىل جاسالدى. تارتىپسىزدىككە قاتىسۋشىلار مۇنى بيلىكتىڭ سيمۆولى رەتىندە باسىپ العىلارى كەلدى. 5-قاڭتارعا قاراعان ءتۇنى شابۋىلداۋشىلار الماتى اكىمدىگىنىڭ عيماراتىنا باسىپ كىردى. ءبىر ساعاتتان كەيىن، شىمكەنتتەگى اكىمدىك عيماراتىنا شابۋىل باستالدى. سول كۇنى قىلمىسكەرلەر اتىراۋ مەن قىزىلوردا وبلىسى اكىمدىكتەرىنىڭ عيماراتىنا شابۋىل جاساي باستادى. شامامەن سول ۋاقىتتا الماتىدا شابۋىلداۋشىلار اكىمدىكتى ورتەپ، پرەزيدەنت رەزيدەنتسياسىنا قاراي باعىت الدى»، - دەدى ب. اسىلوۆ.


سوڭعى جاڭالىقتار