ق ر پرەزيدەنتىنىڭ وزبەكستانعا مەملەكەتتىك ساپارى: 8 ميلليارد دوللار سوماسىنداعى كەلىسىمدەرگە قول قويىلماق
بۇل تۋرالى بۇگىن وزبەك- قازاق ءوڭىرارالىق بيزنەس- فورۋمى كەزىندە ق ر پرەمەر- ءمينيسترىنىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين ءمالىم ەتتى، دەپ حابارلايدى قازاقپارات مەنشىكتى ءتىلشىسى.
پرەمەر- ءمينيستردىڭ ورىنباسارى ەكى ەل اراسىنداعى ساۋدا- ەكونوميكالىق ىنتىماقتاستىقتى دامىتۋ ماڭىزدى ءرول اتقاراتىن ايتتى.
«وزبەكستان قازاقستاننىڭ ورتالىق ازيا وڭىرىندەگى باستى سەرىكتەسى. ەكى ەل ۇكىمەتىنە ساۋدا كولەمىن 10 ميلليارد دوللارعا دەيىن جەتكىزۋ مىندەتى قويىلدى. وسى جىلدىڭ 10 ايىنىڭ قورىتىندىسى بويىنشا ءوزارا ساۋدا 4,1 ميلليارد ا ق ش دوللارىن قۇراپ، وتكەن جىلدىڭ سايكەس كەزەڭىمەن سالىستىرعاندا 35 پايىزعا ءوستى»، - دەدى سەرىك جۇمانعارين.
ونىڭ ايتۋىنشا، قازىر قازاقستاندا وزبەك كاپيتالىنىڭ قاتىسۋىمەن 1400 دەن استام كاسىپورىن مەن 400 دەن استام بىرلەسكەن قازاق- وزبەك كومپانيالارى تابىستى جۇمىس ىستەۋدە. بۇگىنگى تاڭدا ەكى ەل اراسىنداعى ونەركاسىپتىك كووپەراتسيا 2,2 ميلليارد دوللار بولاتىن 38 دەن استام جوبانى قامتيدى، 11 مىڭعا جۋىق جۇمىس ورنى اشىلدى.
«بۇگىنگى فورۋمدا شامامەن 1 ميلليارد دوللار سوماسىنا كەلىسىمشارتتارعا قول قويىلدى. سونىمەن قاتار قازاقستان پرەزيدەنتىنىڭ وزبەكستانعا مەملەكەتتىك ساپارى اياسىندا 8 ميلليارد ا ق ش دوللارىنان استام سوماعا ءبىرقاتار كەلىسىم مەن قۇجاتقا قول قويىلماق»، - دەپ اتاپ ءوتتى ۆيتسە- پرەمەر.
ەسكە سالساق، بۇگىن ق ر پرەزيدەنتىنىڭ وزبەكستانعا مەملەكەتتىك ساپارى باستالادى.
