استانادا 8 جاسار بالانى كولىك قاعىپ كەتكەن كوشە جارىقتاندىرىلاتىن بولدى

«اتالعان ماسەلە باقىلاۋدا. كوشە قىسقا مەرزىم ىشىندە جارىقتاندىرىلادى. وسىعان دەيىن جارىق ۋاقىتشا سحەما بويىنشا بەرىلگەن، سەبەبى كوشەگە جارىق ورناتۋ جۇمىسى تولىق بىتپەگەن. ماسەلە قىسقا مەرزىمدە شەشىلىپ، جارىق تولىق كولەمدە بەرىلەدى»، - دەپ سەندىردى ەلوردا اكىمدىگى.

بۇعان دەيىن حابارلاعانىمىزداي، استانادا 8 جاسار بالانى كولىك قاعىپ كەتكەن كوشەنى تۇرعىندار بوگەپ تاستادى.

«بۇگىن ساعات 17:50 شاماسىندا «Toyota Highlander» اۆتوكولىگىنىڭ جۇرگىزۋشىسى بۇقار جىراۋ كوشەسىمەن كەلە جاتىپ، باعدارشامنىڭ تىيىم سالىنعان سيگنالىنا ءوتىپ بارا جاتقان كامەلەتكە تولماعان بالانى قاعىپ كەتتى. جول اپاتى سالدارىنان 8 جاسار بالا قالالىق اۋرۋحاناعا جەتكىزىلىپ، دارىگەرلەردىڭ قاراۋىنان كەيىن ۇيىنە جىبەرىلدى. بالانى قاعۋ وقيعاسىنان كەيىن جاقىن ماڭداعى تۇرعىندار جولدى جاۋىپ تاستادى. جينالعاندارمەن اڭگىمە جۇرگىزىلدى. اتالعان ۋچاسكەنى جارىقتاندىرۋ قاجەتتىگى تۋرالى اقپارات جەرگىلىكتى اتقارۋشى ورگانعا جەتكىزىلدى»، - دەگەن حابار تاراتتى ءى ءى م.

اۆتور

داۋلەت ىزتىلەۋ