الماتىدا بيىل 8 مىڭنان استام تۇرمىستىق زورلىق-زومبىلىق وقيعاسى تىركەلگەن
بۇل تۋرالى وڭىرلىك كوممۋنيكاتسيالار قىزمەتىنىڭ بريفينگىندە الماتى قالالىق پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسى باسشىسىنىڭ ورىنباسارى، پوليتسيا پولكوۆنيگى دياس دۋانبەكوۆ ايتتى، دەپ حابارلايدى قازاقپارات ءتىلشىسى.
«الماتى قالالىق پوليتسيا دەپارتامەنتى تۇرمىستىق زورلىق-زومبىلىقپەن كۇرەس ماقساتىندا ءبىرقاتار پروفيلاكتيكالىق ءىس-شارا وتكىزۋدە. جالپى، تۇرمىستىق زورلىق-زومبىلىق فاكتىسى بويىنشا پوليتسيا دەپارتامەنتىنە كۇندەلىكتى 10-15 شاعىم تۇسەدى. ءبىز زورلىق جاساۋشىلاردى تاۋىپ، ەسەپكە الامىز، ولارمەن پروفيلاكتيكالىق جۇمىستار جۇرگىزەمىز. قاجەت جاعدايدا جاۋاپقا تارتامىز»، - دەدى دياس دۋانبەكوۆ.
بيىلعى جىلى الماتى قالاسى بويىنشا زورلىق كورسەتۋ فاكتىسى بويىنشا 8 مىڭنان استام شاعىم تۇسكەن.
«ءبىز بيىل تۇرمىستىق زورلىق-زومبىلىق قۇرباندارى تاراپىنان 8 مىڭنان استام شاعىمدى تىركەدىك. ونىڭ ىشىندە كىنالىلەردىڭ %20 ىن جاۋاپقا تارتتىق. قالعانى پوليتسيا جاساعى كەلگەنگە دەيىن جانجالدى توقتاتۋ سەبەبىنەن جاۋاپقا تارتىلعان جوق. بۇگىنگى كۇنى 7 مىڭنان استام ادام بىزدە پروفيلاكتيكالىق ەسەپتە تۇر. ولارمەن ءتيىستى جۇمىستار جۇرگىزىلدى»، - دەدى جەرگىلىكتى پوليتسيا قىزمەتى باسقارماسى باسشىسىنىڭ ورىنباسارى دياس دۋانبەكوۆ.
