الماتىدا كورنەكتى 8 اقىن-جازۋشىعا ارنالعان كورمە جۇمىسىن باستادى

كورمە اقىن- جازۋشىلاردىڭ مەرەيتويىنا وراي ۇيىمداستىرىلدى. بيىل ەلدە مۇحتار اۋەزوۆتىڭ 125 جىلدىق، عابيت مۇسىرەپوۆ پەن عابيدەن مۇستافيننىڭ 120 جىلدىق، ديحان ابىليەۆ پەن عالي ورمانوۆتىڭ 115 جىلدىق، ءادي ءشارىپوۆتىڭ 110 جىلدىق جانە ءازىلحان نۇرشايىقوۆ پەن سافۋان شايمەردەنوۆتىڭ 100 جىلدىق مەرەيتويلارى اتاپ وتپەك. كورمەگە اتالعان اقىن- جازۋشىلاردىڭ ومىرىنەن سىر شەرتەتىن جۇزدەگەن زاتتار قويىلعان. ولاردىڭ اراسىندا قالامگەرلەردىڭ جەكە زاتتارى، كىتاپتارى، ناگرادالارى، پورترەتتەرى، افيشالار، ولاردىڭ شىعارمالارىنا جازىلعان يلليۋستراتسيالار بار.
« ⅩⅩعاسىردىڭ 40-50 -جىلدارىندا قازاق ادەبيەتى قاناتىن كەڭگە جايىپ، تەرەڭ دە كەمەل تۋىندىلارعا قول جەتكىزدى. بۇل كەزەڭدەگى ادەبيەتتىڭ دامۋىنا قازاقتىڭ تۇڭعىش ەپوپەياسىن جازىپ، كوركەم پروزانى كلاسسيكالىق دەڭگەيگە كوتەرىپ، ادەبيەتكە كوركەمدىك قۋات اكەلگەن ۇزدىك تۋىندى - «اباي جولىن» جازعان مۇحتار اۋەزوۆتىڭ قوسقان ۇلەسى زور. سونىمەن قاتار ۇلتتىق پروزانىڭ ەلەۋلى جەتىستىكتەرى - قازاق ادەبيەتىنىڭ التىن قورىنا قوسىلعان شوقتىعى بيىك تۋىندىلار - ع. مۇسىرەپوۆتىڭ «قازاق سولداتى»، «ويانعان ولكە»، تاريحي رومانى، ع. مۇستافيننىڭ سوعىستان كەيىنگى حالىق ومىرىندەگى وزگەرىستەردى بەينەلەۋگە ارنالعان «ميلليونەر» پوۆەسى، «قاراعاندى» رومانى، د. ابىليەۆتىڭ دراماتۋرگيا سالاسىنداعى «قارۋلاس دوستار»، «مايرا» جانە باسقا تۋىندىلارىنىڭ ورنى ەرەكشە. مايدانگەر قالامگەرلەر - ع. ورمانوۆتىڭ «كوتەرمە» دەگەن اتپەن جاريالانعان اڭگىمەلەر مەن وچەركتەر جيناعى، ءا. ءشارىپوۆتىڭ «پارتيزان قىزى» رومانى، كوركەم پروزا جانرىندا سۇبەلى ەڭبەك ەتكەن ءا. نۇرشايىقوۆتىڭ «ماحاببات، قىزىق مول جىلدار»، «اقيقات پەن اڭىز» شىعارمالارى، سونداي- اق كىتاپتارى وقىرمان قاۋىم مەن سىنشىلاردان ءوز باعاسىن العان س. شايمەردەنوۆتىڭ «ينەش» رومانىن قالىڭ وقىرماننىڭ ىزدەپ ءجۇرىپ وقىعانى بارشاعا ءمالىم»، - دەدى ق ر ورتالىق مۋزەيىنىڭ ەكسكۋرسيا ۇيىمداستىرۋ جانە ەكسكۋرسيالىق قىزمەت كورسەتۋ ءبولىمىنىڭ جەتەكشىسى ءبيبىفاتيما باقداۋلەتوۆا.
كورمە اياسىندا عىلىم، مادەنيەت جانە ونەر مەكەمەلەرى مادەنيەتتى دامىتۋ، شىعارماشىلىق باستامالاردى قولداۋ ماقساتىندا ورتاق جوبالار مەن باعدارلامالاردى جۇزەگە اسىرۋ ءۇشىن ءوزارا ىنتاماقتاستىق اياسىندا مەموراندۋم جاسالادى.