تارتىپسىزدىكتەر كەزىندە 8 وڭىردە قانشا نىسان زارداپ شەككەنى بەلگىلى بولدى
نۇر-سۇلتان. قازاقپارات - ۇكىمەتتىڭ بۇگىنگى وتىرىسىندا ق ر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ جاپپاي تارتىپسىزدىكتەر كەزىندە بۇزىلعان وبەكتىلەردى قالپىنا كەلتىرۋ شارالارى تۋرالى مالىمەت بەردى، دەپ حابارلادى قازاقپارات ءتىلشىسى.
«اكىمدىكتەردىڭ جەدەل دەرەكتەرى بويىنشا ەل بويىنشا 8 وڭىردە 53 مەملەكەتتىك نىسان جانە 151 شاعىن جانە ورتا كاسىپكەرلىك نىسانى زارداپ شەكتى. اكىمدىكتەر بۇلىنگەن نىسانداردىڭ ناقتى سانىن كۇن سايىن جاڭارتىپ وتىرادى»، - دەگەن مينيستر مەملەكەتتىك كوميسسيا بۇل ماسەلە بويىنشا ءبىرىڭعاي قادامدىق ءىس-قيمىل الگوريتمىن ازىرلەگەنىن جانە وبەكتىلەردى قالپىنا كەلتىرۋ بويىنشا ناقتى مەرزىمدەر بەلگىلەنگەنىن اتادى.
«بارلىق وڭىرلەردە كەلتىرىلگەن زالالدى تەكسەرۋ جانە باعالاۋ جونىندەگى ءتيىستى كوميسسيالار قۇرىلدى. بۇگىنگى تاڭدا اقاۋ تۋرالى اكتىلەر جاسالىپ، تەحنيكالىق تەكسەرۋ جۇرگىزىلۋدە. كەيىن جەدەل تارتىپتە كۇردەلى جوندەۋ جانە قايتا قۇرۋ بويىنشا جوبالىق- سمەتالىق قۇجاتتاما ازىرلەنەدى. قالپىنا كەلتىرۋ جۇمىستارىن بيۋدجەتتەن قارجىلاندىرۋ ءۇشىن مينيسترلىك اكىمدىكتەر جەتكىزگەن تىزبە بويىنشا قاجەتتى قۇجاتتامانى جينايدى»، - دەدى قايىربەك وسكەنبايەۆ.
اۆتور: ەسىمجان ناقتىباي
