قىتايدىڭ سولتۇستىگىندە ەلەكتر ستانساسىندا ءورت شىعىپ، 8 ادام مەرت بولدى

بەيجىڭ. قازاقپارات - قىتايدىڭ سولتۇستىك- شىعىسىندا شانسي پروۆينسياسىندا ەلەكتر ستانساسى اۋماعىندا ءورت شىعىپ، 8 ادام مەرت بولدى، تاعى بەسەۋى جاراقات الدى. بۇل تۋرالى قىتايدىڭ ورتالىق تەلەارناسى (CCTV) ءمالىم ەتتى، دەپ حابارلايدى قازاقپارات.

CCTV مالىمەتىنشە، ءورت جەرگىلىكتى ۋاقىتپەن 6-جەلتوقسان تۇنگى ساعات 01:36 دا شانسي پروۆينسياسى (سولتۇستىك- شىعىس قىتاي) شوۋيان ۋەزىندە ەلەكتر ستانساسى اۋماعىنداعى ادام تۇراتىن جەردەن شىققان. ءورت جەرگىلىكتى ۋاقىتپەن ساعات 04:20 دا اۋىزدىقتالدى.

سالدارىنان سەگىز ادام قازا تاۋىپ، بەسەۋى جاراقات الدى. جاراقات العاندار اۋرۋحاناعا جەتكىزىلدى، ولاردىڭ جاعدايى ءبىرقالىپتى. قازىر ءورتتىڭ قايدان، قالاي شىققانى انىقتالىپ جاتىر.

اۆتورى رۋسلان سۇلەيمەنوۆ