وسكەمەندە ۇيىنەن قاشقان 8-سىنىپ وقۋشىسى الماتىدا تۇرمىسقا شىعىپ كەتكەن

وسكەمەن. قازاقپارات - شىعىس قازاقستاندا ۇيىنەن قاشقان جەتكىنشەك قىز الماتىدا تۇرمىسقا شىعىپ كەتكەن، دەپ حابارلايدى قازاقپارات.

وبلىستىق پ د باسپا ءسوز قىزمەتى ءمالىم ەتكەندەي، وسكەمەندە 48 جاستاعى ايەل قىركۇيەكتە قالالىق پوليسيا باسقارماسىنا حابارلاسىپ، كامەلەتكە تولماعان قىزىنىڭ جوعالعانىن جەتكىزگەن. ونىڭ 8-سىنىپتا وقيتىن قىزى ماۋسىم ايىنىڭ سوڭىندا ۇيدەن كەتىپ قالعان. ايەل قىزدى الماتىدان تاۋىپ، ۇيىنە الىپ كەلۋگە بەل بۋعان. قالادان شىعار الدىندا جانارماي بەكەتىنە توقتاعان ساتتە ونىڭ قىزى قايتادان قاشىپ كەتكەن. 19 -قىركۇيەكتە جەدەل- ىزدەستىرۋ شارالارىن جۇرگىزۋ بارىسىندا ش ق و پ د كريمينالدىق پوليتسيا قىزمەتكەرلەرى الماتىدان ءجاسوسپىرىم قىزدى تاپقان. ونىمەن سويلەسكەن جەدەل ۋاكىلدەر ونىڭ ۇيدەن ءوز ەركىمەن كەتكەنىن انىقتاعان. ول الماتىدا ءومىر سۇرگىسى كەلىپ، سىعاندار ءداستۇرى بويىنشا تۇرمىسقا شىعىپ كەتكەن.

ءتارتىپ ساقشىلارى ونى اتا- اناسىنىڭ ۇيىنە قايتاردى. وسى قىركۇيەكتە پوليسيا تاعى ءبىر كامەلەتكە تولماعان ادامدى تاپتى. تامىز ايىندا سەمەي قالاسىنىڭ پوليتسيا باسقارماسىنا 20 جاستاعى جاس جىگىت 17 جاستاعى قارىنداسى 17-تامىز كۇنى تاڭەرتەڭ ۇيدەن شىعىپ، سودان كەيىن ورالماعانىن حابارلاعان. قىزدىڭ قالتاسىنداعى ۇيالى تەلەفون ءسوندىرۋلى بولعان. 20-قىركۇيەك كۇنى كريمينالدىق پوليتسيا قىزمەتكەرلەرى ونى نۇر- سۇلتان قالاسىنان تاپتى. بويجەتكەن جۇمىسقا ورنالاسۋعا نيەتتەنىپ جۇرگەن.

ەسكە سالا كەتەيىك، كەشە سەمەيدە تۇراتىن 14-جاسار قىزدىڭ «ۆكونتاكتە» الەۋمەتتىك جەلىسى ارقىلى كورشى قالادا تۇراتىن جىگىتپەن تانىسىپ، ونىمەن كەزدەسۋ ءۇشىن ۇيىنەن قاشىپ كەتكەنىن جازعان بولاتىنبىز. ءجاسوسپىرىم ءتارتىپ ساقشىلارىنا ۇيدەن ءوز ەركىمەن كەتكەنىن ايتقان، ونىڭ سەبەبى اتا- اناسىمەن بىرگە تۇرعىسى كەلمەيتىنىن ايتقان.