شىمكەنت مەكتەبىندە ۋىتتى گاز باللونى شاشىلعان: 8 ادام زارداپ شەكتى

شىمكەنت. قازاقپارات - شىمكەنت مەكتەپتەرىنىڭ بىرىندە ۋىتتى گاز باللونى شاشىلعان، دەپ حابارلايدى قازاقپارات ءتىلشىسى.

ساباق اراسىنداعى قىسقا ۇزىلىستەردىڭ كەزىندە مەكتەپ وقۋشىلارىنىڭ ءبىرى بۇرىش قوسىلعان گاز باللونىن شاشىراتقان. سونىڭ سالدارىنان 7 وقۋشى مەن مەكتەپتىڭ 1 قىزمەتكەرى زارداپ شەككەنى بەلگىلى.

«مۇنداي جاعداي مەكتەپ قابىرعاسىندا العاش رەت ورىن الىپ وتىر. بۇگىن شامامەن ساعات 09.50 دە 9-سىنىپ وقۋشىسى ءۇزىلىس كەزىندە اكەسى ءوزىن- ءوزى قورعاۋ ءۇشىن ساتىپ اپەرگەن بۇرىش قوسىلعان گاز باللونىن قولدانىپ كورۋگە تىرىسقان. ول تەك شاشىپ كورمەك بولعان. ءتۇسىندىرۋ جۇمىسى جۇرگىزىلدى»، - دەدى ءبىلىم ورداسى ديرەكتورىنىڭ ورىنباسارى نۇرماحانبەت ءابدىرازاقوۆ.

وقيعا ورنىنا بىردەن جەدەل جاردەم قىزمەتى جەتىپ، بالالارعا العاشقى كومەك كورسەتكەن. شىمكەنت قالالىق دەنساۋلىق ساقتاۋ باسقارماسىنىڭ باسشىسى باقىتجان پوزىلوۆتىڭ ايتۋىنشا، №55 مەكتەپتە بەلگىسىز ادامنىڭ ۋىتتى گاز باللونىن شاشقانى تۋرالى اقپارات تۇسكەن. ءبىراق، بالالاردىڭ دەنساۋلىعىنا ايتارلىقتاي قاۋىپ جوق. ولار بۇرىشتىڭ وتكىر جاعىمسىز ءيىسىن سەزىنگەن.

«شۇعىل تۇردە جەدەل جاردەم قىزمەتىنىڭ 3 بريگاداسىن جىبەردىك. ولار وقيعا ورنىنا 7-8 مينۋتتىڭ ىشىندە جەتتى. 7 وقۋشى مەن مەكتەپتىڭ ءبىر قىزمەتكەرىن تەكسەردى. بارلىعىنا دا العاشقى مەديتسينالىق كومەك كورسەتىلدى. 3 وقۋشىنى قالالىق گيبەرباريالىق وتتەكتەنۋ ورتالىعىنا جەتكىزدىك. ولارعا دا العاشقى كومەك كورسەتىلىپ، ۇيلەرىنە اپاردىق. قازىرگى ۋاقىتتا بارلىعىنىڭ جاعداي جاقسى. ءۇش كۇن بويى ولاردى باقىلاۋدا ۇستايمىز»، - دەدى باقىتجان پوزىلوۆ.