فينليانديادا 8 جىل باس بايگەنى بەرمەگەن قازاق سايگۇلىگى
1992 -جىلى الماتىدا دۇنيەجۇزى قازاقتارىنىڭ ءبىرىنشى قۇرىلتايى ءوتتى. وسىندا حالىق شارۋاشىلىعىنىڭ كورمەسى ءوتىپ، وندا جەر تارپىعان ارعىماق «انونس» فين ەلى پرەزيدەنتىنىڭ كوزىنە تۇسكەن ەكەن. ءسويتىپ قوناعىن قۇدايىنداي سىيلاعان دارحان قازاق حالقىنىڭ اتىنان ەلباسىمىز الگى تۇلپاردى مارتەبەلى مەيمانعا سىيلايدى.
قازىر حەلسينكي شاھارىندا ھاس تۇلپاردىڭ تاس ءمۇسىنى تۇر. فينليانديا پرەزيدەنتىنە «انونستى» جەتكىزگەن ەكەۋدىڭ ءبىرى - تىنىشتىقباي سىزدىقوۆ. بۇگىندە اقساقال سەكسەننىڭ سەڭگىرىنە شىققان.
الايدا ءبىز مارتەبەلى قوناققا ۇناعان جىلقىنى ەمەس، سوعان ۇقسايتىن «زاسلون» اتتى كۇرەڭقاسقانى اپارىپ بەردىك. ونى «انونستىڭ» قۇجاتىمەن راسىمدەگەن بولاتىنبىز، - دەيدى قاريا.
«ءبىراق ول شەتەلگە بارىپ «سۋجۇيرىككە اينالادى« دەگەن وي ءۇش ۇيىقتاساق تۇسىمىزگە كىرمەگەن»، - دەپ اعىنان جارىلدى تىنىشتىقباي سىزدىقوۆ.
تىنىشتىقباي سىزدىقوۆ، شيەلى اۋدانىنىڭ تۇرعىنى:
«ول جەرگىلىكتى كۇرەڭقاسقا جىلقى، ءبىراق ونىمەن شاۋىپ كورمەگەن عوي. ول انا جاققا بارعان كەزدە شاپقان، ءبىر اتتىڭ ول جاقتا اياعى جاراماي قالىپ، سونىڭ ورنىنا قوسقان ەكەن. سويتسە، ول ءبىرىنشى ورىن الىپ كەلىپتى. سودان باستاپ اتاعى شىعا بەرگەن عوي. ءبارى ريزا ءبلىپ، ەسكەرتكىش قويىپ، ءماز بولىپ جاتقان جوق پا ەندى. ونىمەن شاپقان بالا بىلاي دەپ ايتىپتى عوي: «مەن اتقا ءمىنىپ، ءجۇرىپ قۇستىڭ ۇستىندە كەلە جاتقانداي بولدىم«. مىنانداي اتتى شاۋىپ كورگەنىم جوق» دەپتى.
«انونستىڭ» فينلياندياعا اتتانباعان سەبەبىن ايتايىق. 6 رەت قاتارىنان الامان بايگەنىڭ الدىن بەرمەي، اقىرىندا جاقسى ات اياعىنان قالعان ەكەن. ونى مەملەكەت باسشىلارى تاماشالاعان كورمەگە دە جاراقاتىمەن اپارعان كورىنەدى. جارامسىز اتتى سىيعا بەرگەنىمىز جاراسپاس دەگەن ويمەن، «انونستىڭ» اتىن جامىلىپ، «زاسلوندى» شەتەلگە اتتاندىرۋدىڭ باستى سەبەبى وسى بولسا كەرەك. ءبىراق قوس تۇلپار ءبىر- بىرىنە قوس تامشىداي وتە قاتتى ۇقساعان. ماۋنا كويۆيستو ءبىر كورگەن قازاق جىلقىسىن ۇمىتپاسا كەرەك، ورنىنا باسقا جىلقى اكەلىنگەنىن بىردەن بايقاپتى. دەگەنمەن اشىپ ەشتەڭە ايتپاعان.
ءبىر قۋانتارلىعى - سىرى بەلگىسىز سىر سايگۇلىگى سىرتتا ءجۇرىپ «جۇلدىزعا» اينالعان. 8 جىل بويى باس بايگەنى بەرمەگەن. وعان لايىقتى قۇرمەت كورسەتىلىپ، فينليانديانىڭ اتاقتى جىلقىلارىنا ارنالعان ارنايى اللەياعا جەرلەنىپ، تاس بەلگى دە قويىلىپتى.
ال ارادا 29 جىل وتكەننەن كەيىن ەرەكشە سىيدى امان- ەسەن جەتكىزگەن تىنىشتىقباي اقساقال مەن قىدىريا كۇلىبايەۆتى فينليانديا مەملەكەتى بيىل قىركۇيەك ايىندا وتەتىن كورول كۋبوگىنە ارنالعان الامان بايگە مەن باسقا دا سالتاناتتى شارالاردىڭ قۇرمەتتى قوناعى رەتىندە قاتىسۋلارى ءۇشىن ارنايى شاقىرۋ قاعازىن جولداعان.
قىدىريا كۇلىبايەۆ، شيەلى اۋدانىنىڭ تۇرعىنى:
«ول ۇلكەن ابىروي ەمەس پە؟ قازاقستاننان بارىپ، ۋاقىتىسىندا اپارعان سايگۇلىگىمىز قانداي تاماشا ۇلكەن جەتىستىكتەرگە جەتكەن ەكەن. ءبىراز پرەزيدەنتتىڭ ۇلكەن اللەياسى بار ەكەن، جىلقىلارىنا تاس بەلگى قويىلادى. سونى ەسكە الادى، الامان بايگە، عىلىمي كونفەرەنتسيا وتەدى ەكەن. سونىڭ ءبارىن «قىزىقتاپ كورسىن« دەپ ولار ادامگەرشىلىك قاسيەتتەرىنە مىڭ دا ءبىر راقمەت»
تىنىشتىقباي اقساقال الىس جولعا جارامايتىنىن، سوندىقتان بۇگىنگىدەي ىندەت ءورشىپ تۇرعان ساتتە شەتەلگە شىعۋدان باس تارتقانىن ايتتى. ال قىدىريا كۇلىبايەۆ قازاق تۇلپارى تۋرالى اڭىزعا بەرگىسىز اڭگىمەگە كوز جەتكىزۋ ءۇشىن فين ەلىنە اتتانباق نيەتتە.
24.kz