ءبىلىم مينيسترلىگى 8 ج و و-نىڭ قىزمەتىن تەكسەرەدى - اسحات ايماعامبەتوۆ
بۇل جايىندا ءماجىلىس دەپۋتاتتارىنىڭ ساۋالىنا ءبىلىم جانە عىلىم ءمينيسترى اسحات ايماعامبەتوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«2020 -جىلعى جەلتوقساننان باستاپ، جوعارى وقۋ ورىندارىنىڭ كوممەرتسيالىق ەمەس اكسيونەرلىك قوعامدارعا قايتا ۇيىمداستىرىلۋىنىڭ اياسىندا مينيسترلىك ۆەدومستۆولىق باعىنىستى جوعارى وقۋ ورىندارىمەن بىرلەسىپ، ولاردىڭ ەسەبىن رەتكە كەلتىرۋ، جەر كودەكسىنىڭ تالاپتارىنا سايكەس كەلتىرۋ، جوعارى وقۋ ورىندارىنىڭ جىلجىمايتىن مۇلىك وبەكتىلەرى تۋرالى مالىمەتتەردى مەملەكەتتىك ورگانداردىڭ دەرەكتەرىمەن بىرىزدەندىرۋ ماقساتىندا جەر ۋچاسكەلەرىن قوسا العاندا، بارلىق جىلجىمايتىن مۇلىك وبەكتىلەرىن تۇگەندەۋ بويىنشا جۇمىس جۇرگىزۋدە. سونىمەن قاتار، وسى جىلى مينيسترلىك سەگىز جوعارى وقۋ ورنىنىڭ قىزمەتىن تەكسەرۋدى جوسپارلاپ وتىر، ونىڭ بارىسىندا ولاردىڭ اكتيۆتەرىنىڭ جايكۇيى تەكسەرىلەتىن بولادى»، - دەدى مينيستر.
ونىڭ اتاپ وتۋىنشە، مينيسترلىك مەملەكەتتىك مۇلىك جونىندەگى ۋاكىلەتتى ورگاندا كەلىسۋدەگى جىلجىمايتىن مۇلىكتى، ونىڭ ىشىندە جەر ۋچاسكەلەرىن يەلىكتەن شىعارۋ ماسەلەلەرىن ديرەكتورلار كەڭەسىنىڭ قۇزىرەتىنە جاتقىزۋ بولىگىندە ج و و جارعىلارىنا وزگەرىستەر ەنگىزۋ ماسەلەسىن پىسىقتاعان. بۇل باقىلاۋدى كۇشەيتۋگە جانە جوعارى وقۋ ورىندارىنىڭ اكتيۆتەرىن قانداي دا ءبىر يەلىكتەن شىعارۋدىڭ الدىن الۋعا مۇمكىندىك بەرەدى.
«جوعارى وقۋ ورىندارىنىڭ ديرەكتورلار كەڭەستەرى كورپوراتيۆتىك شەشىمدەر قابىلداۋ كەزىندە اشىقتىقتى قامتاماسىز ەتۋ ءۇشىن قۇرىلعانىن اتاپ وتكەن ءجون. ديرەكتورلار كەڭەسىنىڭ قۇرامىنا قازاقستان رەسپۋبليكاسى پارلامەنتىنىڭ دەپۋتاتتارى، ءبىلىم بەرۋ سالاسىنىڭ كورنەكتى قايراتكەرلەرى جانە تاۋەلسىز ساراپشىلار ەنگىزىلگەن. وسى ماقساتتا كونكۋرستىق راسىمدەر وتكىزۋ ارقىلى جوعارى وقۋ ورىندارىنىڭ رەكتورلارىن تاعايىنداۋدىڭ اشىق جۇيەسى ەنگىزىلدى. جالپى، جوعارى وقۋ ورىندارى قىزمەتىنىڭ تيىمدىلىگى مەن اشىقتىعىن ارتتىرۋ ماسەلەلەرى مينيسترلىكتىڭ تۇراقتى باقىلاۋىندا»، - دەدى اسحات ايماعامبەتوۆ.
اۆتور: مارلان جيەمباي
